«Barys» Qurlyqtyq hokkei ligasyndaǵy kezekti kezdesýin Ekaterinbýrgte jergilikti «Avtomobilist» komandasymen ótkizdi, dep habarlaidy QazAqparat.
Oiynnyń birinshi bóliginde aidyn ieleri basymdaý bolǵanymen, esep ashylǵan joq. «Barystyń» qaqpashysy Ioni Ortio sátti oinai bildi.
Ekinshi kezeń barysynda elordalyqtar shvetsiialyq Iýhan Mattsson qorǵaǵan qaqpany kóbirek nysanaǵa alǵanymen, sheshýshi sátte múlt ketip jatty. Tipti san basymdylyǵyn da paidalana almady. Degenmen 35-minýtta «Barystyń» kapitany Roman Starchenko mergendik tanytty – 1:0.
Úshinshi taim sońynda «Avtomobilist» komandasy qaqpashysyn oiynshyǵa aýystyrǵan sátte Linden Vei esepti 2:0-ge jetkizdi.
Osylaisha 40 upai jinaǵan elordalyq klýb Shyǵys konferentsiiasynda «Avtomobilisti» artqa qaldyryp, jetinshi orynǵa kóterildi.
Iýrii Mihailistiń shákirtteri kelesi matchyn 23 jeltoqsan kúni Tatarstan astanasy Qazanda jergilikti «Ak Bars» komandasymen ótkizedi.
