Biyl Qoja Ahmet Iasaýi atyndaǵy halyqaralyq qazaq-túrik ýniversitetine 30 jyl toldy. Oqý orny úshin aitýly mereitoidy atap ótý byltyrdan beri qolǵa alynyp, túrli deńgeidegi aýqymdy is-sharalar ótkizilip keledi. Al búgin ýniversitet ujymy Túrkistannyń tórinde keń kólemde gala-kontsert uiymdastyryp, jyl kóleminde istelgen jumystardyń núktesin qoidy. Bul týraly oblys ákimdiginiń baspasóz qyzmeti habarlady.
Ahmet Iasaýi ýniversiteti baýyrlas Túrkiia Respýblikasymen bekem yntymaqtastyq nátijesinde túrki áleminiń ortaq bilim-ǵylym shańyraǵyna ainaldy. Sondyqtan da ýniversitet tarihyndaǵy mańyzdy sharany birge atap ótý úshin Qazaqstan men búkil túrki áleminen qonaqtar qatysty. QR Ǵylym jáne joǵary bilim vitse-ministri Qýanysh Erǵaliev, Túrkistan oblysynyń ákimi Darhan Satybaldy, Túrkiia Respýblikasynyń Sheteldik túrikter jáne baýyrlas ulttar basqarmasynyń tóraǵasy Abdýllah Eren, Túrki memleketteri uiymy bas hatshysynyń orynbasary Ómer Qojaman, Túrkistan oblysynyń ziialy qaýym ókilderi, sondai-aq túrki álemi men qazaqstandyq ýniversitettiń basshylary, ýniversitet ujymy, túlekter men stýdentter jinaldy.
Is-shara aiasynda «Ýniversitet jetistikteri» kórmesi uiymdastyrylyp, onda ýniversitettiń 30 jylda jetken jetistikteri, ǵylymi ónertabystary, qoǵamǵa paidaly bolý maqsatynda jasaǵan jobalary, stýdentterdiń shyǵarmashylyq eńbekteri kórsetildi.
Al negizgi gala-kontserttiń shymyldyǵyn ýniversitet rektory Janar Temirbekova men rektor ókili Jengiz Tomar ashyp, jinalǵan kópshilikke erekshe alǵysyn aitty. Oqý orny basshylary 30 jyl júrip ótken belestegi negizgi dúnielerdi tilge tiek etti.
Túrkistan oblysynyń ákimi Darhan Satybaldy «Túrkistannyń rýhani ortalyq bolýyna Qoja Ahmet Iasaýi babamyzdyń úlesi mol. Al osyndai oishyl, ǵulamanyń atyn ielengen ýniversitet Túrkistannyń ǵana emes, barlyq Túrki elderiniń mádenietine, bilim men ǵylym salasynyń damýyna zor úles qosyp keledi», dei kele QR Prezidenti Qasym-Jomart Toqaevtyń quttyqtaý hatyn oqyp berdi.
Al is-sharaǵa arnaiy kelgen QR Ǵylym jáne joǵary bilim vitse-ministri Qýanysh Erǵaliev ýniversitettiń elimizdegi bilim men ǵylym salasynyń damýyna ólsheýsiz úles qosyp kele jatqanyn aityp, ministr Saiasat Nurbektiń arnaiy quttyqtaýyn jetkizdi.
«Bul ýniversitetti táýelsizdigimizdiń jarshysy, baýyrlas túrki elderi arasyndaǵy berik yntymaqtastyqtyń nyshany dep bilemin. Zaman talabyna sai damyp, túrki tildes ulttardan jinalǵan jastarǵa dáiekti bilim berip, tárbielep, sara jolǵa salǵan, ózindik brendi qalyptasqan oqý orny 30 jyl ishinde óte biik tabystarǵa qol jetkizdi», dep jazǵan quttyqtaý sózinde Saiasat Nurbek.
Budan soń oqý ornynyń basshylary bir top memlekettik organdardyń basshylaryna ýniversitettiń 30 jyldyq arnaiy tósbelgisin tabystady. Al halyqaralyq TÚRKSOI uiymy ýniversitetke eńbegi sińgen oqytýshylardyń keýdesine Ahmet Baitursynuly atyndaǵy medaldi taqty.
Shara ári qarai merekelik kontsertke ulasyp, ýniversitet stýdentteri men oqytýshylary «Qoja Ahmet Iasaýi» qoiylymyn sahnalap, jinalǵan kópshilikke ánder men bilerden shashý shashty.
