2020 jyldyń II toqsanynda Halyqqa qyzmet kórsetý ortalyqtarynda «qandastarǵa» memlekettik qyzmetti bir mezgilde kórsetý tetigi iske qosylady. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy QazAqparat.
«Zańnamaǵa sáikes qandastarǵa «Eńbek» nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasy aiasynda «Eńbek naryǵy» avtomattandyrylǵan aqparattyq júiesi arqyly júzege asyrylatyn erikti túrde qonys aýdarýdy qoldaý sharalaryn qosa alǵanda, halyqty jumyspen qamtý salasyndaǵy kórsetiletin qyzmettermen qamtamasyz etýge qandastarǵa Qazaqstan Respýblikasynyń azamattarymen teń múmkindik beriledi. Sonymen qatar Memleket basshysynyń (2020 jylǵy 22 qazanda Ulttyq qoǵamdyq senim keńesiniń tórtinshi otyrysynda berilgen) «Eńbek» memlekettik baǵdarlamasy aiasynda qonys aýdarýshylarǵa jáne qandastarǵa soltústik óńirlerge kóshýge beriletin sýbsidiialar mólsherin 2 ese – 35-ten 70 AEK-ke deiin ulǵaitýǵa qatysty tapsyrmasyn iske asyrý boiynsha Úkimet qaýlysynyń jobasy ázirlendi», - dedi Asqar Mamin.
Onyń aitýynsha, tarihi otanyna shetelden oralǵan qandastarǵa konsýltatsiialyq jáne aqparattyq qoldaý kórsetý maqsatynda Almaty jáne Shymkent qalalarynda, sondai-aq Almaty, Aqmola, Soltústik Qazaqstan, Shyǵys Qazaqstan, Qaraǵandy, Qostanai, Pavlodar jáne Jambyl oblystarynda «Qandastardy aqparattyq qoldaý ortalyqtary» (front ofister) quryldy.
«Atalǵan front ofister 2020 jyly qandastardyń 5 myńnan astam ótinishin qarady. «Azamattarǵa arnalǵan úkimet» memlekettik korporatsiiasymen birlesip, «bir tereze» qaǵidaty boiynsha «qandastarǵa» memlekettik qyzmet kórsetý kezinde biznes-protsesterdi ońtailandyrý jónindegi jol kartasy iske asyrylýda», - dedi Úkimet basshysy.
Asqar Maminniń atap ótýinshe, osy jyldyń II toqsanynda Halyqqa qyzmet kórsetý ortalyqtarynda óńirlik kvotaǵa engizýdi, turaqty turýǵa ruqsat alýdy jáne jeńildetilgen tártippen Qazaqstan Respýblikasynyń azamattyǵyna qabyldaýdy kózdeitin «qandastarǵa» memlekettik qyzmetti bir mezgilde kórsetý iske qosylatyn bolady.
«Budan basqa, qandastardy beiimdeý jáne integratsiialaý ortalyqtarynda (Qaraǵandy, Túrkistan oblystary jáne Shymkent qalasy) aqparattyq-anyqtamalyq qyzmetter kórsetiledi. Onyń ishinde Qazaqstan Respýblikasynyń tarihy, mádenieti men dástúrleri, zańnama negizderi jáne shaǵyn biznes ashý boiynsha oqytý kýrstaryn ótkizý, qandastardyń qoǵamǵa beiimdelýi men integratsiiasyn jedeldetýge yqpal etetin jumysqa ornalasýǵa kómek kórsetiledi», - dedi Premer-Ministr.
