Foto: Baǵdat Mýsinniń Feisbýk paraqshasynan
Qazaqstanda jeke kýálikti nemese tólqujatty bir kúnde rásimdeýge bolatyn jańa terminal paida boldy. Bul týraly QR tsifrlyq damý, innovatsiialar jáne aeroǵarysh ónerkásibi ministri Baǵdat Mýsin habarlady.
"Búgin Ishki ister ministri Marat Muratuly Ahmetjanovpen birge jeke kýálikter men tólqujattardy rásimdeýge arnalǵan jańa terminaldyń tusaýkeserine qatystyq. Endi qazaqstandyqtar qujattardy óz betinshe ári jyldam alýǵa ótinim bere alady.
Kezek kútýge, sodan keiin kóshi-qon qyzmetiniń qyzmetkerinen tirkeýden ótip, sýretke túsip, tólem jasaý úshin kassaǵa bólek júgirýge ýaqyt jumsaýdyń qajeti joq. Qujattaý terminaly bárin bir jerde jasaýǵa múmkindik beredi, sonymen qatar árbir adam qujat úshin sátti túsken fotosýretin óz betinshe tańdai alady. Protsess 10 minýttan aspaidy", - dep jazdy ministr.
Alaida, qatelikter men túsinispeýshilikterdi boldyrmaý úshin ótinish berýshige kóshi-qon qyzmetiniń qyzmetkerine júginý qajet bolady. Ol ótinishtiń, sýrettiń jáne qoltańbanyń sáikestigin tekseredi.
"Ázirge mundai terminal tek Astana qalasynda Kerei men Jánibek handar kóshesiniń 4/1 úiinde ornalasqan HQKO-da ornatylǵan. Aldaǵy ýaqytta osy jobany barlyq óńirlerde iske asyrý josparlanyp otyr", - dedi Baǵdat Mýsin.
"Azamattarǵa arnalǵan úkimet" memlekettik korporatsiiasy jobany Qazaqstan Respýblikasynyń Ishki ister ministrligimen, onyń ishinde Kóshi-qon qyzmeti komitetimen jáne IIM Aqparattyq-óndiristik ortalyǵymen ózara tyǵyz is-qimyl jasai otyryp ázirlegen.
