Foto: khabar.kz
«Habar» agenttigi Qazaqstan Respýblikasy Oqý-aǵartý ministrliginiń qoldaýymen 11(12) synyp oqýshylary arasynda «HHI ǵasyr kóshbasshysy» ziiatkerlik oiynyn qaita jańǵyrtty.
Biylǵy jyldyń qarasha aiynda elimizdiń barlyq óńirinde bastalǵan irikteý kezeńi 2025 jyldyń sáýir aiyna deiin jalǵasady. Óńirlik kezeńniń nátijesi boiynsha árbir oblystan 5 úzdik oqýshy respýblikalyq kezeńge joldama alady. Ol 2025 jyldyń naýryz-sáýir ailarynda Almaty qalasynda ótedi dep josparlanyp otyr.
Ziiatkerlik saiysynyń tapsyrmalary jalpy bilim, logika, mýzyka, óner, sport sekildi túrli salalardy qamtidy. Aýdandyq kezeńde qatysýshylar 45 minýt ishinde 30 suraqqa jaýap berýleri kerek bolsa, oblystyq kezeńde 60 suraqtyń sheshimin tabýǵa 75 minýt ýaqyt beriledi.
«Bul teleoiynnyń oqýshylardyń ziiatkerlik áleýetin damytýǵa aitarlyqtai úles qosatynyna jáne olardyń bilimge, óz ózin jetildirýge umtylýyna serpin beretinine senimdimiz. Joba eń talantty, daryndy kóshbasshylardy tanýǵa, tańdaýǵa septigin tigizedi», - deidi «Daryn» RǴPO-nyń direktory Ǵajdembek Tursynov.
Esterińizge sala keteiik, «HHI ǵasyr kóshbasshysy» teleoiyny «Habar» respýblikalyq telearnasynda alǵash ret 1999 jyly jaryqqa shyqty. 25 jyl ishinde ol birneshe ret jańaryp, joǵarǵy jáne kishi toptar formatynda da usynyldy.
Oqýshylardyń bilimi men intellektýaldy damýyn arttyrýǵa, sondai-aq elimizdiń bolashaq ziiatkerlik áleýetin qalyptastyrýǵa baǵyttalǵan telejoba endi Oqý-aǵartý ministrliginiń qoldaýymen qaitadan óz kórermenimen qaýyshady.
