Midjourney neiron jelisi arqyly jasalǵan keskin
Oqý-aǵartý ministri Ǵani Beisembaev hidjab kiiýine bailanysty sabaqqa barmai júrgen oqýshy qyzdar týraly saýalǵa jaýap berdi, dep habarlaidy Kazinform agenttigi.
Búgin Úkimet otyrysynan keiingi brifingte BAQ ókilderi ministrden «Atyraý oblysynda 150 qyzdyń mektepke barmai júrgeni týraly naqty aqparat bar. Óitkeni, olar hidjabpen júredi, kirgizbeidi. Ózge óńirler boiynsha aqparat bar ma?» dep suraǵan edi.
Ǵani Beisembaev jańa oqý jyly bastalǵan kezde hidjap kigen oqýshy qyzdardyń sany 150-den de kóp bolǵanyn jasyrǵan joq.
Degenmen, olardyń ata-anasymen túsindirý jumysy júrgizilgenin atap ótti.
«Mektep balalardyń sapaly bilim men tárbie alýǵa arnalǵanyn jaqsy bilesizder. Sondyqtan ata-analar túsinip, qabyldai bastady. Qazirgi ýaqytta bul másele sheshildi. Mendegi aqparatqa sáikes, basqa óńirlerde oramal taǵatyn oqýshylar joq», — dedi ministr.
Osy rette BAQ ókilderi elimizde mektepke hidjabpen baryp júrgen bir de bir oqýshynyń joqtyǵyn taǵy da naqtylap surady.
«Basynda problema boldy. Búginde másele tolyǵymen sheshildi. Ata-analar mekteptiń eń birinshi mindeti — sapaly bilim men tárbie berý ekendigin túsine bastady. Biz birinshisin ekinshisimen shatastyrmaýymyz kerek», — dedi Ǵani Beisembaev.
