Midjourney neiron jelisi arqyly jasalǵan keskin
Ádilet vitse-ministri Alma Muqanova qoǵamda talqylanyp jatqan hidjab máselesine túsinik berdi, dep habarlaidy Kazinform agenttigi.
«Bul máselege qatysty qoǵamda biraz pikirtalas júrip jatyr. Tipti, halyqaralyq tájiribege nazar aýdarsańyz, álem elderinde de osyndai jaǵdai. Oǵan tyiym salǵan elder de, ruqsat bergender de bar. Kórshi turǵan Ózbekstan men Qyrǵyzstannyń tájiribesin alyp qarasaq ta, bul máseleler qazirdiń ózinde olardyń parlamentinde qyzý talqylanyp jatyr. Qatelespesem, kei kórshiler bul tyiymdy zańdastyryp qoiǵan», - dedi Muqanova tilshi suraǵyna jaýap bere otyryp.
Bul turǵyda ol elimizde din ustaný quqyǵyna eshqandai shekteý joq ekenin, iaǵni osy baǵytta konstitýtsiialyq quqyq bar ekenin aitty.
Degenmen qoǵamdyq qaýipsizdik máselesine qatysty tiisti shekteýler boiynsha birqatar norma engizilýi múmkin.
«Jalpy, osyndai másele kóterilip, tiisti normalardy qarastyrý usynymy engizilse, biz muny taǵy da zań turǵysynan zerdeleimiz», - dedi vitse-ministr.
Sondai-aq ol oramal taǵýǵa tyiym salynýyna bailanysty qyzdardyń oqý ornyna barýdan bas tartqany jaily videorolikterge pikir bildirdi.
«Jalpy, bul saladaǵy is-qimyldar reglamenttelgen. Bilim berý uiymdarynda tiisti shekteý bar. Osy taqyrypta birqatar laýazymdy adam túsinik bergen», - dedi Muqanova.
