QAZAQSTAN RESPÝBLIKASYNYŃ PREZIDENTI N.Á. NAZARBAEVQA
ÚNDEÝ
ASA MÁRTEBELI ELBASY!
Sizge úndeý jasaýymyzǵa basty túrtki – 25 jyldyq Táýelsizdigimizdiń quny men qadyry.
Qazaqstan TMD keńistigindegi eń sońynan táýelsizdengen el bolsa da, bodandyq buǵaýynan bosaýǵa eń alǵash úndegen bizdiń halqymyz edi. Ózińizge málim, egemen bolýymyzdyń HH ǵasyr sońyndaǵy birden bir jarqyn kórinisi 1986 jylǵy Jeltoqsan oqiǵasynan bastaý alady. Bul oqiǵaǵa ózińiz de laiyqty baǵasyn berip óttińiz.
Odan bergi kezeńde, elimiz azattyq úshin kúres jolyna túserde saiasi sahnaǵa «Azat» qozǵalysy shyqty. Kezinde birneshe júz myń adamdy qamtyǵan bul uiym jerimizdiń tutastyǵyna óziniń tarihi izin qaldyrǵany taǵy da málim jáne oǵan da ózińiz jaqsy baǵa berdińiz. Ol – 1991 jylǵy Oral oqiǵasy bolatyn. Sonyń baǵasy retinde qozǵalys basshylyǵynda bolǵan Jasaral Qýanyshálinge óz qolyńyzben kezinde «Parasat» ordenin de tabys ettińiz.
Desek te, ulttyń ulyq dáýirine óz úlesin qosqan «Azat» qozǵalysy tarih ǵylymy tarapynan da, saiasi saladan da óziniń tolyq baǵasyn alǵan emes. Másele, uiymnyń tarihi róliniń baǵalanýynda turǵan joq, eń aldymen elimizdiń Táýelsizdik alýy men onyń qalyptasýyna úles qosqan kúshterdiń tarihtan óz ornyn alýy – Azattyǵymyzdyń baǵalanýy, qadyry men qasietiniń kórsetkishi ekendiginde. Eldiń Táýelsizdigi ózińiz bastaǵan saiasi tulǵalardyń janqiiarlyq qairatkerligimen birge, Azattyq jolyndaǵy túrli kezeńde tarihtan oryn alǵan uiymdar men qozǵalystardyń, toptardyń eren erligimen ólshenedi. Ókinishke orai, adamzat moiyndaǵan bul qaǵida bizdiń egemen bolǵan 25 jyldyq qysqa tarihymyzda ázirge tolyq eskerilmei keledi. Azatkerlerdiń madaqsyz qalýy Azattyǵymyzdyń boiaýyn solǵyndatyp turǵanyn eskergenińiz abzal bolar edi.
Osy atalǵan jaittardy eskere otyryp, qurmetti Prezident myrza, Sizdiń nazaryńyzdy ózindik qarapaiym da shynaiy beinesimen erekshelenetin Hasen Káripjanuly Qojahmet tulǵasyna aýdarǵymyz keledi. Bul kisi - ótken ǵasyrdyń 70-jyldarynyń ózinde alashtyń azattyǵy jolynda saiasi dissidend bolǵan búgingi kózi tiri azatker saiasatshy. Hasen Káripjanuly sońǵy 25 jyl boiy tynbastan el men ulttyń múddesi jolynda túrli joldardan ótip, qairatkerlik tanytyp keledi. Ol – qazaq halqynyń azattyǵy jolynda tý ustaýǵa talpynǵan HH ǵasyr sońyndaǵy qaharmandardyń biregeii deýge ábden turatyn tulǵa. Ol - Jeltoqsan ereýiliniń erekshe qatysýshysy, «Azat» qozǵalysynyń aitýly jetekshileriniń biri.
Sizden elimizdiń Táýelsizdiginiń 25 jyldyq mereii qarsańynda Qojahmet Káripjanuly Hasenge «Halyq Qaharmany» ataǵyn bergenińizdi qalaimyz. Bul ataq Hasen Káripjanulyna degen baǵa emes, eń áýeli osy jolda eńbektenip, qairattanyp, jigerlene úles qosqan myńdaǵan otandastarymyzdyń ishinen onyń oqshaý kóringen janqiiarlyǵy men otanshyldyǵynyń shynaiy beinesi men tulǵasyna degen baǵa bolatyndyǵy sózsiz. Sol arqyly Siz asa qadyrly da aiaýly Táýelsizdigimizdi ardaqtaýdyń úlgisin qoǵamymyz aldynda ǵana emes, tarih aldynda pash etkenińiz bolar edi. Bul sheshim Sizdiń tarapyńyzdan jalpy ult azatkerlerine degen tarihi ádiletti baǵa bolary sózsiz.
Qurmetpen – «Azat» qozǵalysynyń ardagerleri men azatker azamattar
Aralbaev Daniiar
Baimolda Munaidar
Elgezek Dina
Erǵali Serik
Jailybai Estai
Júsip Saǵat
Qani Arman
Qoshamanuly Nurlybai
Kenebai Jumash
Mustafa Seiilhan
Nurmahan Mýhit
Nýsipova Meiramgúl
Italiev Aitqali
Sairov Erlan
Shynybekuly Ómir
................................
taǵy basqalary.
QOJA AHMET Hasen Kárimjanuly
1949 jyly tamyz aiynyn 9 kúni Taldyqorǵan oblysy, Matai stantsiiasynda dúniege kelgen. Mamandyǵy - mýzyka teoriiasynyń muǵalimi, jýrnalist. Almaty memlekettik P.Chaikovskii atyndaǵy mýzykalyq ýchilisheni jáne Ál-Farabi atyndaǵy QazMUÝ bitirgen.
1986 jyly Jeltoksan okiǵasyna belsene qatysýshy jáne uiymdastyrýshylardyń biri degen aiyp taǵylyp, tórt jylǵa sottaldy. 1989 jyly «Jeltoqsan» qoǵamdyq komitetin qurýǵa belsene qatysyp, 1990-1994 jyldary osy komitetti basqardy. 1994 jyly AQSh-tyń Minnesota jáne Vashington qalalarynda resmi jiyndarǵa qatynasyp sóz sóiledi. 1995 jyly Briýssel qalasynda ótken Qazaqstandaǵy ultaralyq jaǵdai taqyrybyndaǵy konferenniiaǵa qatysty.
2005 jyly «Ult taǵdyry» qozǵalysyn qurýǵa atsalysyp, onyń birinshi quryltaiynda qozǵalys tóraǵasynyń orynbasary bolyp sailandy. Sonymen qatar, 1993 jyldan «Azat» qozǵalysynyń, 2007 jyldan «Jer máselesin sheshý» halyqtyq qozǵalysynyń tóraǵasy qyzmetterin atqardy.
Ult portaly
