Foto: ashyq derekkóz
QR Ishki ister ministriniń orynbasary Igor Lepeha Qazaqstanda áielderdi harassmentten qorǵaýǵa baǵyttalǵan zańdy qabyldaý múmkindigine qatysty suraqqa jaýap berdi, dep habarlaidy Kazinform.
Onyń aitýynsha, qazirgi kezde vedomstvo qysym kórsetýge jol bermeýge arnalǵan zań jobasy ázirlep jatyr.
«Qazir qoǵamda bul taqyryp kóterilip jatyr jáne harassment boiynsha usynystar da aitylyp júr. Bul turǵyda qarama-qaishy pikirler de kezdesip otyr. Bireýler qoldasa, keibiri úzildi-kesildi qarsy. Sondyqtan biz olardy jumys tobynyń otyrystarynda talqylaimyz. Bul másele áli de qoǵamdyq talqylaýda», - dedi I.Lepeha Senattyń jalpy otyrysynan keiin tilshiler suraǵyna jaýap bere otyryp.
Buǵan deiin jumystaǵy harassment úshin jaýapkershilik engizilýi múmkin ekeni habarlanǵan edi. Byltyr senator Darhan Qydyráli Qazaqstandaǵy áielder jumysta zorlyq-zombylyq pen qýdalaýǵa tap bolatynyn aitty
«Elimizde harassmenttiń aldyn alatyn arnaiy zańnyń bolmaýy da úlken másele. Jazalanbai jeńil qutylatynyn biletinder túrli júgensizdikke barady, qylmysty qymsynbai jasaidy. Sondyqtan qorǵansyzdyń kúnin keshpes úshin azamattarymyzdy zorlyq-zombylyqtan qorǵaityn zańnamany kúsheitý kezek kúttirmeidi», - dedi D.Qydyráli.
