10 jeltoqsanda para aldy degen kúdikpen ustalǵan Atyraý oblysy ákiminiń orynbasary Baqytgúl Hamenova jaýap alýdan soń ýaqytsha ustaý izoliatoryna qamaldy, dep habarlady jergilikti "Aq jaiyq" basylymy.
Basylym derekkóziniń málimetinshe, Baqytgúl Hamenova men oblystyq mádeniet basqarmasynyń basshysy Aqylbek Rysqaliev Atyraýda aqyn Abai Qunanbaiulynyń eskertkishin ornatý boiynsha memlekettik satyp alý kelisimshartyn jasaýǵa 4 mln 500 myń teńge kólemindegi para alǵan. Sálden keiin Rysqaliev kinásin moiyndap keldi, al Hamenovany jaýap alýdan keiin ýaqytsha ustaý izoliatoryna jibergen.
Derekke súiensek, Abai eskertkishin ornatýǵa qatysty byltyr eki ret usynys aitylǵan. Birinshi usynys oblystyq máslihat sessiiasynda, keiin uly aqynnyń 175 jyldyǵyn toilaý aiasynda jasalǵan. Atyraý oblysynyń ákimi Mahambet Dosmuhambetov pen depýtattar ideiany qoldap, sodan keiin tenderge daiyndyq bastalǵan bolatyn. Aldyn ala málimet boiynsha, kelisimshart somasy - 150 mln teńge, mádeniet basqarmasy alǵashqy transhty ótkizip úlgeripti.
"AJ" málimetine sáikes, 12 jeltoqsanda sybailas jemqorlyqqa qarsy is-qimyl agenttiginiń qyzmetkerleri tergeý sotynda Hamenovany eki ai qamaýǵa alý týraly ótinish bermek.
Baqytgúl Hamenova oblys ákiminiń orynbasary laýazamyna ótken jyldyń 13 naýryzynda kelgen. Oǵan deiin "Nur Otan" partiiasy atynan Parlament Májilisiniń VI shaqyrylymynyń depýtaty boldy.
Esterińizge sala keteiik, keshe Atyraý oblysy ákiminiń orynbasary Baqytgúl Hamenova men oblystyq mádeniet basqarmasynyń basshysy Aqylbek Rysqaliev 4,5 million teńge kóleminde para aldy degen kúdikpen ustalǵan edi.
Sonymen qatar Atyraý oblysy ákiminiń eki orynbasaryna qatysty sot protsesi júrýde: birinshi orynbasary Nurlan Taýbaev 182 mln teńge para aldy dep aiyptalsa, Qairat Nurlybaev aýyl sharýashylyǵy basqarmasynyń basshysy bolǵan kezinde 80 million teńge kólemindegi aýyl sharýashylyǵy sýbsidiiasyn zańsyz bóldi dep aiyptalýda.
