Foto: Ammar Awad/Reuters
Palestinalyq "HAMAS" qozǵalysynyń áskeri qanaty bolyp tabylatyn "Ál-Kassam" brigadalary Tel-Avivtegi Ben Gýrion halyqaralyq áýejaiy baǵytynda zymyrandar ushyrylǵanyn málimdedi, dep habarlaidy RIA Novosti agenttigi.
"Ál-Kassam" brigadalary jalǵasyp jatqan qylmystar men azamattardyń úilerine jasalǵan shabýyldarǵa jaýap retinde Ben Gýrion áýejaiyna zymyranmen jappai oq jaýdyrdy", - dep jazylǵan Hamastyń áskeri qanaty taratqan málimdemede.
Sonymen qatar brigadalar Izraildiń ońtústigindegi Ashkelon qalasyna qarai 100 zymyran baǵyttalǵanyn habarlady.
Al Izrail armiiasy eldiń ortalyǵynda zymyran shabýyly týraly eskertetin dabyl qurylǵylary iske qosylǵanyn málimdedi.
Aita keteiik, palestinalyq Hamas qozǵalysynyń áskeri qanaty senbi kúni Izrailge qarsy "Ál-Aqsadaǵy topan sý" operatsiiasyn jariialady.
Al Izrail qorǵanys kúshteri Gaza sektorynda Hamasqa qarsy "Temir semserler" operatsiiasyn bastaǵanyn habarlady. Izrail premer-ministri Biniamin Netaniahý halyqqa úndeýinde eldiń soǵys jaǵdaiynda ekenin aityp, rezervterdi keńinen jumyldyrýdy tapsyrǵanyn málimdedi.
Jerusalem Post gazeti palestinalyq-izraildik qaqtyǵystyń shielenisýi kezinde Izrailde qaza tapqandar sany 300-den asqanyn, 1,5 myńnan astam adamnyń zardap shekkenin jazdy. Palestina densaýlyq saqtaý ministrliginiń sońǵy málimeti boiynsha, Izraildiń Gaza sektoryna jasalǵan soqqylar saldarynan qaza tapqandar sany 232-ge jetken, 1,7 myńǵa jýyq adam jaraqat alǵan.
Qazaqstannyń Syrtqy ister ministrligi taraptardy "tek eki memleket arasyndaǵy ǵana emes, jalpy Taiaý Shyǵystaǵy jaǵdaidyń odan ári shielenisýine ákeletin áreketterge barmaýǵa" shaqyrdy.
