Halyqtyń senimin arttyrý úshin jemqorlyqtyń kez kelgen kórinisimen ymyrasyz kúres qajet. Bul týraly QR Prezidenti Ákimshiligi basshysynyń orynbasary Erjan Jienbaev aitty, dep habarlaidy QazAqparat.
«Sybailas jemqorlyqqa qarsy kúres elimizdiń strategiialyq damýyndaǵy negizgi basymdyqtardyń biri. Bul Prezidentimizdiń berik ustanymy jáne sailaýaldy baǵdarlamasynda halyqqa bergen ýádesi. Sońǵy jyly bul baǵytta jasalǵan jumys az emes, júieli sipatqa ie bolýda. Birqatar mańyzdy mindet júzege asyryldy. Memleket basshysynyń Qazaqstan halqyna Joldaýda jariia etken tapsyrmalaryn oryndaý úshin qazirdiń ózinde quqyq qoorǵaý organdary qyzmetkerleriniń, sýdialardyń, para berýshiler men deldaldardyń jemqorlyǵy úshin jaýapkershilik qatańdatyldy. Asa aýyr jemqorlyq qylmys úshin shartty túrde merziminen buryn bosatý alynyp tastaldy», - dedi ol QR Sybailas jemqorlyqqa qarsy is-qimyl agentiginiń alqa otyrysynda.
Onyń aitynsha, kvazimemlekettik sektordaǵy jemqorlyq úshin jaýapkershilik kúsheitilip, ulttyq kompaniialarda jemqorlyqqa qarsy komplaensterdiń negizgi bekitildi.
«Halyqaralyq yntymaqtastyq nyǵaia túsýde. Qazaqstan GREKO halyqaralyq uiymyna qosyldy. Myqty quqyqtyq irgetas qalandy jáne reformalardy tabysty júzege asyrý úshin jemqorlyqqa qarasy sharalar men bastamalardyń barlyq toptamalarynyń múltiksiz ári shynaiy oryndalýyna qol jetkizý óte mańyzdy. Adam men biznes quqyǵyn qorǵaý basty nazarda qala beredi. Halyqtyń senimin arttyrý úshin jemqorlyqtyń kez kelgen kórinisimen ymyrasyz kúres qajet. Qoǵamda quqyqtyq nigilizmniń taralýyna jol bermeý mańyzdy», - dedi Erjan Jienbaev.
