QR Premer-Ministri Asqar Maminniń tóraǵalyǵymen ótken Úkimet otyrysynda eldi mekenderdi sýmen jabdyqtaý jáne sý burý máselesi qaraldy, dep habarlaidy "Ult aqparat".
Búgingi tańda ortalyqtandyrylǵan sýmen jabdyqtaý qalalarda – 97,2%, aýyldarda – 86,4% quraidy.
100% ortalyqtandyrylǵan sýmen jabdyqtaý Soltústik Qazaqstan, Mańǵystaý jáne Atyraý oblystarynda, aýyldar boiynsha Almaty (98,8%), Atyraý (98,4%) jáne Qyzylorda (97,2%) oblystarynda qamtamasyz etildi. Ortalyqtandyrylǵan sýmen jabdyqtaýǵa qoljetimdilik boiynsha tómen kórsetkishter Qostanai (61,1%), Jambyl (72,6%) jáne Pavlodar (73,3%) oblystarynda baiqalady.
53 qalada kárizdik tazartý qurylystaryn salý, rekonstrýktsiialaý jáne jańǵyrtý boiynsha jumys júrgizilýde, qarjylandyrý kózderi (ADB jáne EQDB zaimdary) aiqyndaldy, jobalyq qujattamany daiyndaý júrgizilýde.
«Halyqty taza aýyz sýmen jabdyqtaý máselesi - Úkimettiń strategiialyq mindeti jáne ol halyqtyń ómir súrý sapasyn jaqsartýǵa tikelei áser etedi. Ár ákimdiktiń eldi mekenderge tiisti infraqurylymdy jetkizý boiynsha naqty jospary bolýy kerek», – dedi A. Mamin.
Úkimet basshysy «Nurly jer» memlekettik baǵdarlamasyn iske asyrý qorytyndysy boiynsha 2025 jylǵa qarai halyqtyń 100% taza aýyz sýmen qamtamasyz etiletinin atap ótti. Osy máseledegi mańyzdysy, toptyq sý qubyrlarynyń infraqurylymyn jasaý jáne aýyldardyń shekarasyna deiin jetkizý kerek. Bul jumys jelilerdi eldi mekenderdiń ishinde tartýmen úilesimdi júrgizilýi qajet.
Premer-Ministr jobalardyń shyǵyndaryn qysqartyp, jergilikti qamtýdy damytý maqsatynda sýmen jabdyqtaý jáne sý burý jobalaryn iske asyrý kezinde jobalaý-smetalyq qujattamanyń tiptik jobalaryn, sondai-aq otandyq óndirýshilerdiń materialdaryn paidalanýdy tapsyrdy.
Ekologiia ministrligine toptyq sý qubyrlaryn basqarý júiesin odan ári jetildirý boiynsha sharalar qabyldap, olardy salý jáne rekonstrýktsiialaý jobalaryn ýaqtyly iske asyrýdy qamtamasyz etý tapsyryldy. Bul rette 2021 jyldyń sońyna deiin 197 myń turǵyny bar 38 eldi mekenge sý júrgizýdi kózdeitin, uzaqqa sozylǵan úsh jobanyń qurylysyn aiaqtaý qajet ekeni atap ótildi.
Indýstriia, ulttyq ekonomika, qarjy, ekologiia, densaýlyq saqtaý ministrlikterine halyq úshin tarifterdiń artýyna jol bermeý maqsatynda qyzmet kórsetýdi jáne qaryzdy óteýdi eskerýmen kárizdik tazartý qurylystaryn salý jáne rekonstrýktsiialaý jobalaryn iske asyrý tetigin zań júzinde bekitýdi qamtamasyz etý tapsyryldy.
Jiynda Indýstriia jáne infraqurylymdyq damý ministri B. Atamqulov, ekologiia, geologiia jáne tabiǵi resýrstar ministri M. Myrzaǵaliev, Jambyl oblysynyń ákimi B. Saparbaev, Pavlodar oblysynyń ákimi Á. Sqaqov, Qostanai oblysynyń ákiminiń birinshi orynbasary G. Nurmuhambetova baiandama jasady.
