QR Parlament Májilisiniń depýtattary Aqtaý qalasynyń turǵyndarymen kezdesti, dep habarlaidy QazAqparat.
Májilis depýtattary Samat Musabaev pen Edil Jańbyrshin Aqtaý turǵyndarymen kezdesip, suiytylǵan gazdyń baǵasyna bailanysty týyndaǵan jaǵdaidy talqylady.
«Bul jerge sizder úshin kelip turmyz. Senderdiń janaiqailaryńdy, máselelerińdi, bárin Úkimetke, Parlamentke, ákimge, ministrge jetkizýge mindettimiz», - dedi Samat Musabaev halyqtyń ortasyna shyǵyp.
Onyń aitýynsha, suiytylǵan munai gazynyń baǵasyn Úkimettik komissiia naqtylaýy kerek.
«Komissiia jumysy ári qarai jalǵasady. Ashyq otyrys bolady, jabyq otyrys bolady. Sonyń bárine qatysamyz, biz sizdermen árdaiym birgemiz. Baǵany túsirýge, áli de túse me, 85 kúiinde qala ma, sol turǵyda jumys isteimiz», - dedi depýtat.
Eske salsaq, Memleket basshysy Qasym-Jomart Toqaev Twitter-degi suiytylǵan gaz baǵasynan bastalǵan paraqshasynda Jańaózendegi jaǵdaiǵa qatysty jazba jariialaǵan bolatyn.
«Úkimetke Jańaózendegi jaǵdaidy ekonomikalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tiis. Azamattardyń jergilikti jáne ortalyq bilik organdaryna talabyn ashyq aitýǵa quqyǵy bar, biraq, bul zańǵa, naqtyraq aitqanda, beibit sherýler týraly zańǵa sáikes júzege asyrylýy kerek» delingen jazbada.
Al QR Premer-Ministriniń resmi saity Mańǵystaý oblysyndaǵy janarmai stansalarynyń ieleri suiytylǵan munai gazynyń qunyn litrine 120 teńgeden 85-90 teńgege deiin tómendetý týraly sheshim qabyldaǵanyn jazdy.
