Kókshetaýda 8 qazanda joǵalyp ketken tórt jasar balanyń denesi keshke qala kósheleriniń birindegi ashyq káriz qudyǵynan tabyldy. Oqiǵaǵa qatysty qylmystyq is qozǵaldy, dep habarlaidy ult.kz.
Aqmola oblysy politsiia departamentiniń málimetinshe, balanyń joǵalǵany týraly habarlama sol kúni kezekshi bólimge túsken. Izdeý jumystaryna politsiia men Tótenshe jaǵdailar departamentiniń qyzmetkerleri jumyldyrylǵan.
Politsiianyń aldyn ala málimeti boiynsha, balanyń denesinen zorlyqpen ólim belgileri anyqtalmaǵan. Qazir oqiǵanyń mán-jaiy tekserilip jatyr.
Tergeý múddesine bailanysty politsiia ázirge ózge aqparatty jariialamady.
