26 qazannan bastap halyqaralyq tranzittik júk tasymalyn júzege asyratyn júrgizýshilerden koronavirýsqa PTR-test anyqtamasy talap etiledi. Bul týraly tolyǵyraq Densaýlyq saqtaý ministrligi Sanitarlyq-epidemiologiialyq baqylaý komitetiniń tóraǵasy Aijan Esmaǵambetova aityp berdi, dep habarlaidy QazAqparat.
«Álemde koronavirýs juqtyrý deńgeii ósip bara jatqanyn atap ótý kerek. Búginge deiin indet 215 elge taraǵan. Álemde koronavirýs juqtyrǵan azamattardyń sany 41 millionnan asyp ketti. 1 million 128 myń 931 adam qaitys boldy. Iaǵni Eýropa men Aziiada koronavirýs juqtyrý deńgeii azaimai tur», - dedi Aijan Esmaǵambetova búgin Ortalyq kommýnikatsiialar qyzmetinde ótken baspasóz máslihatynda.
Komitet basshysy buryn avtokólik arqyly Qazaqstan shekarasyna kiretin jolaýshylardan ǵana PTR-anyqtama talap etilip kelgenin eske saldy.
«Halyqaralyq tranzittik júk tasymalyn júzege asyratyn júrgizýshiler PTR-test anyqtamasyz júre beretin. 26 qazannan bastap ondai júrgizýshilerden de PTR-test anyqtamasy talap etiletin bolady. Bul anyqtama bolmaǵan jaǵdaida olar shekarada testileýden ótýge mindetteledi. Eger olardyń ishinen koronavirýs juqtyrǵany anyqtalsa, olar toqtaǵan jerindegi aýrýhanaǵa jatqyzylady», - dedi ol.
