Búgin Konfessiiaaralyq jáne órkenietaralyq dialogty damytý jónindegi N.Nazarbaev ortalyǵy alańynda eń bedeldi ǵalymdar, tanymal halyqaralyq saraptama ortalyqtarynyń (think tanks) sarapshylary jahandaný, din, dialogtyń ózekti máseleleri boiynsha mazmundy pikirtalas ótkizdi, dep habarlaidy QazAqparat.
Konferentsiia barysynda halyqaralyq sarapshylar Táýelsiz Qazaqstannyń qalyptasýy men damýyndaǵy, túrli konfessiialar arasyndaǵy beibitshilik pen kelisimniń tiimdi modelin qurýdaǵy, Álemdik jáne dástúrli dinder liderleriniń sezi aiasynda álemdegi dinaralyq jáne mádenietaralyq dialogty damytýdaǵy QR Tuńǵysh Prezidenti – Elbasy N.Á.Nazarbaevtyń airyqsha róli men kórnekti úlesine erekshe nazardy aýdardy. Olar biraýyzdan Qazaqstan halqyn Qazaqstan Respýblikasynyń Táýelsizdik kúnimen quttyqtap, álemdik jáne dástúrli dinder arasyndaǵy jahandyq dialogty damytýdaǵy halyqaralyq bastamalardyń mańyzdylyǵyn atap ótti.
«Qazaqstannyń mádeniet, dinder men órkenietter arasyndaǵy dialog tarihy ǵasyrlardan bastalady. Álemdik jáne dástúrli dinder kóshbasshylarynyń alty sezi osy elde ótip, dialog alańyna ainalǵan meken bolyp qalyptasýy - zańdylyq. Búgingi tańda konfessiiaaralyq jáne órkenietaralyq dialogty damytý, aimaqtyq jáne jahandyq qaýipsizdik pen turaqtylyqty qamtamasyz etý - Qazaqstannyń jalpy strategiiasynyń mańyzdy bóligi», - dedi Ózbekstan Respýblikasynyń Ministrler Kabineti janyndaǵy Islam órkenieti ortalyǵynyń halyqaralyq bóliminiń bastyǵy Olima Gýliamova.
Al Resei Ǵylym akademiiasy Shyǵystaný institýtynyń aǵa ǵylymi qyzmetkeri V.Nemchinovtyń aitýynsha, búkil álem pandemiia zardaptaryna qaramastan, elder dinder, ultaralyq qatynastardy nyǵaitýǵa kómektesip, rýhani qundylyqtardy nasihattaýǵa úles qosýy kerek.
«Pandemiia bizge ulttyq shekara adamdardyń qozǵalysyna kedergi bola alatyndyǵyn kórsetti, biraq mádenietter arasyndaǵy yntymaqtastyq úshin shekara joq», - dep atap ótti V.Nemchinov.
«UniaoPlanetaria» kommertsiialyq emes uiymynyń prezidenti Edýardo Ýiver óz sózinde jahandaný jaǵdaiynda dini álemniń tabysty damýynyń negizgi printsipterin aityp, Qazaqstannyń túrli mádenietter men dinderdi biriktirip, úlken ister atqaryp jatqandyǵyna nazar aýdartty.
«Qazaqstan osy saladaǵy jańa kóshbasshy, ártúrli dinder men mádenietter toǵysatyn ortalyqqa, bir-birin túsinýge jáne qurmet kórsetýge baýlityn meken bolýǵa betburys jasady. Jahandaný úderisteri bizge dialog ornatýǵa, mádenietter men dinder arasynda kópir qurýǵa, ózara túsinistik pen dostyqtyń negizi retinde qarastyrýǵa múmkindik beredi dep úmittenemin», - dedi «Woolf Institute» institýtynyń atqarýshy direktory Ester-Miriam Vagner.
Sheteldik jáne qazaqstandyq sarapshylardyń sózderin qorytyndylai kele, Konfessiiaaralyq jáne órkenietaralyq dialogty damytý jónindegi N.Nazarbaev ortalyǵynyń basqarma tóraǵasy Altai Ábibýllaev jahandyq týrbýlenttik jaǵdaiynda álemde jańa syn-qaterler men qaýip-qaterlerdiń paida bolýy - qazirgi zamanǵy dinaralyq jáne konfessiiaaralyq qatynastar tereń qaita baǵalaný men transformatsiiadan ótip jatqanyn basa aitty. Osy turǵyda dinder men órkenietaralyq damý máselelerin jan-jaqty zertteýge mamandandyrylǵan ǵylymi-sarapshylyq qoǵamdastyqtyń, ulttyq jáne halyqaralyq ǵylymi-zertteý institýttary men ortalyqtarynyń róli artyp kele jatqandyǵyn jetkizdi.
«Dinaralyq dialog pen órkenietter seriktestigi tek urandar bolmaýy kerek. Biz ulttyq jáne jahandyq deńgeide sheshim qabyldaýda túrli múddelerdi úilestirýdiń barlyq tásilderin, adamdardyń moraldyq sezimin, ómir saltyn, ulttyq jáne dini dástúrlerin qurmetteýmen biriktiretin álemdik tártipti qurýymyz kerek. Jahandaný dáýiri kórsetip otyrǵandai, dialog jáne toleranttylyq mádenieti qazirgi álemniń basty qundylyq baǵdary bolady», - dedi Altai Ábibýllaev.
Halyqaralyq ǵylymi-praktikalyq konferentsiianyń qorytyndylary boiynsha qatysýshylar konfessiiaaralyq jáne órkenietaralyq dialog máselelerin odan ári zertteý, dinaralyq problemalardy sheshýde ózara is-qimyldyń turaqty tetikterin qalyptastyrý, sondai-aq Álemdik jáne dástúrli dinder liderleri seziniń otyrystary jáne onyń institýttary sheńberindegi yntymaqtastyq boiynsha tiisti praktikalyq usynystar ázirledi.
Is-sharaǵa Aqparat jáne qoǵamdyq damý ministrliginiń Din isteri komitetiniń tóraǵasy Erjan Núkejanov, Ulybritaniia, Vatikan, Braziliia, Pákistan, Reseiden álemdegi jetekshi aqyl-oi ortalyqtarynyń ókilderi qatysyp, óz pikirlerin ortaǵa saldy.
