Oqý-aǵartý ministri Ashat Aimaǵambetov biylǵy halyqaralyq pán olimpiadalarynyń aralyq qorytyndysyn jariialady, dep habarlaidy "Ult aqparat".
"Búgingi kúnge deiin oqýshylarymyz 5 pánnen 21 medal jeńip aldy. Ulttyq qurama qorjynynda 3 altyn, 13 kúmis jáne 5 qola medal bar. Iaǵni 23 qatysýshynyń 21-i júldeli oryndarǵa ie boldy. Bul jerde eń bedeldi halyqaralyq olimpiadalar týraly aityp otyrmyz.
Biyl tuńǵysh ret Prezidenttiń qoldaýynyń arqasynda oqýshylarymyz 4,5 mln teńgege deiin qomaqty aqshalai syiaqy alyp, UBT tapsyrmai-aq, JOO-ǵa grantqa túsý múmkindigine ie bolady.
Matematikadan halyqaralyq olimpiadada (IMO) Qazaqstan quramasy 3 kúmis jáne 3 qola júldeni jeńip aldy. Komandamyz 174 upai jinap, elimizdiń olimpiadaǵa qatysý tarihyndaǵy jańa rekordyn ornatty. Komandalyq esepte elimiz 17-orynda, al bul - 12 jyldaǵy úzdik kórsetkish. Fizikadan halyqaralyq olimpiadada oqýshylarymyz 1 altyn, 4 kúmis medal ielendi. Bul sońǵy 8 jyldaǵy eń jaqsy kórsetkish. Byltyr komandanyń qorjynyna 5 kúmis túsken bolatyn. Geografiiadan halyqaralyq olimpiadada oqýshylarymyz ekinshi jyl qatarynan altyn medal jeńip aldy. Biyl da 1 qola medalǵa ie boldyq. Biologiiadan halyqaralyq olimpiadanyń qatysýshylary 3 kúmis jáne 1 qola júlde jeńip alyp, byltyrǵy nátijelerin jaqsartty. Byltyr 1 kúmis jáne 2 qola medal, sondai-aq bir Qurmet gramotasyn alǵan bolatyn. Al ziiatkerlik saiysqa qatysqan jas himikterimizdiń jumysyn óte joǵary baǵalaýǵa bolady. Olar 1 altyn jáne 3 kúmis jeńip aldy. Onyń ústine bul 2017 jyldan bergi alǵashqy «altyn» boldy" - dep jazdy ministr.
Salystyrmaly túrde alsaq, byltyr komandamyz 3 kúmis jáne 1 qola medalmen marapattalǵan.
"Barlyq baǵytta oń ózgeris bar ekenin baiqaýǵa bolady. Bul balalarymyzdyń daiyndyq deńgeiin kórsetedi.
Aldaǵy ýaqytta informatika men lingvistikadan olimpiadalar ótedi. Oqýshylarymyz elimizdiń namysyn abyroimen qorǵaitynyna senimim mol.
Oqýshylarymyzdy jetken jetistikpen quttyqtaimyn. Qoldaý kórsetken ata-analaryna jáne kásibi sheberligi úshin áriptesterime de alǵys aitqym keledi" - dep túiindedi Aimaǵambetov.
