Almaty teatrynda belgili dramatýrg, QR Memlekettik syilyǵynyń laýreaty Dýlat Isabekovtyń 80 jas mereitoiyna orai, II halyqaralyq «Isabekov álemi» teatr festivali bastaldy. Festival shymyldyǵyn alǵash ret Túrkistan mýzykalyq drama teatrynda sahnalanǵan «Bórte» spektakli ashty.
Bórte – álem tarihyndaǵy uly qairatkerlerdiń biri, Shyńǵys hannyń qońyrat taipasynan alǵan birinshi áieli. Bórtege arnalǵan tuńǵysh shyǵarmanyń qazaq sahnasynda qoiylýy da «tuńǵysh» ekenin atap aitý kerek. Qoiylym 10-11 jastaǵy Temýchin (Shyńǵys hannyń shyn esimi) men Bórteniń alǵash tanysýynan bastalyp, Shyńǵys qaǵannyń alyp imperiiany basqaryp turǵan kezeńin qamtidy. Bul kezeńde Temýchin alaýyzdyq jailaǵan mońǵol taipalaryn birtutas memleketke biriktirip, Shyńǵys qaǵan atanady. Shyńǵys han áskeriniń jeńisti joryǵy Qytaidan bastalyp, Ýkrainada bolǵan ataqty «Qalqa ózeni boiyndaǵy shaiqasqa” deiin jetedi. Spektaklde ójet te qaisar, ajarly da aqyldy, batyr da batyl, bir basynda dramasy men tragediiasy jetip artylatyn qaisar áiel Bórte hanymnyń ǵumyry baiandalady.
«Bórte» spektakliniń rejisseri italiialyq – Davide Livermor, kórkemdik jetekshisi – Ainur Kópbasarova, kompozitor – Hamit Shanǵaliev, ádebi redaktor – Shynar Omarova, ǵylymi keńesshi –tarihshy, t.ǵ.k., Nurlan Atyǵaev. Rólderde – Erkebulan Daiyrov, Leilo Aqnazar, Ádil Ahmetov, Qonysbek Bekaidarov, Zámzagúl Bekaidarova, Alihan Idrysheva, Nartai Saýdanbekuly, Aqbota Rahat, Áshim Ahmetov, Tolqyn Nurbekova jáne Túrkistan mýzykalyq drama teatrynyń ártisteri.
Qoiylym dekoratsiianyń shynailyǵymen, sahnalyq kiimderdiń tartymdylyǵymen, rekvizitterdi sheberlerdiń arnaiy daiyndaýymen erekshelenedi.
