Prezidenttikke kandidat Qaraqat Ábdenniń el óńirlerindegi sailaýaldy saparlary jalǵasýda. Búgin kandidat Shymkent qalasyndaǵy «AGF Grýpp» atty tigin fabrikasynyń ujymymen júzdesti, dep habarlaidy úmitker shtabynyń baspasóz qyzmeti.
Kezdesý barysynda kandidattyń baǵdarlamasy tanystyrylyp, qoǵamdaǵy ózekti máseleler men áleýmettik suraqtar talqylandy. Tigin fabrikasy ujymynyń basym kópshiligi áielder qaýymy bolǵandyqtan, olardyń tarapynan kandidat usynǵan áiel-analardy, kóp balaly otbasylardy qoldaý men ulttyq qundylyqtardy dáripteýge qatysty sharalarǵa basa mán berildi.
«Otbasy men analardyń áleýmettik máseleleri – bul el ekonomikasynyń damýyn kórsetetin birden-bir kórsetkish. Meniń sailaýaldy baǵdarlamamda bul suraqtarǵa kóp kóńil bólingen. Árbir otbasy, ásirese kóp balaly otbasynyń rýhani-ónegelik áleýeti zor, sondyqtan ol halyqtyń ǵasyrlar boiy jinaqtalǵan ulttyq qundylyqtaryn saqtap, urpaqtan-urpaqqa jetkizetin mańyzdy uǵym bolyp tabylady. Qazirgi kezde otbasy institýtyn jan-jaqty nyǵaitý, onyń mártebesin arttyrý, kóp balaly analarǵa qoldaý kórsetý erekshe mańyzdy», - dedi Ábden.
Sondai-aq búgingi kezdesýge OBSE baiqaýshylar missiiasynyń ókilderi Kristofer Makkaloý men Kristina Bogdanova qatysty. Olar úgit-nasihat naýqanynyń barysymen, Qaraqat Ábdenniń sailaýaldy shtabtarynyń jumysymen tanysty.
Eske salsaq, elimizde 20 qarasha kúni kezekten tys prezident sailaýy ótedi. Kandidat Q.Ábden el aimaqtaryn aralap, 8 oblysta 30-dan astam kezdesý ótkizdi. Aldaǵy ýaqytta ol Túrkistan jáne Jambyl oblystarynyń sailaýshylarymen júzdesedi.
