Astanalyqtarǵa arnalǵan jańa sait iske qosylady. Onda qala turǵyndary ózin mazalaǵan saýaldaryn joldap jáne máseleleriniń sheshý jolyn usyna alady.
Bul týraly Nur-Sultan qalasynyń ákimi Altai Kólginov málim etti, dep habarlaidy "Ult aqparat".
«Biz qala turǵyndaryn mazalaǵan máselelerdi surap, bilip ony árdaiym nazarda ustaýymyz kerek. Odan bólek, Memleket basshysynyń «Halyq únine qulaq asatyn memleket» tujyrymdasyn umytpaǵanymyz jón. Qazirgi ýaqytta halyqtyń talap-tilegine nazar salý maqsatynda qaladaǵy 4 aýdan boiynsha eseptik kezdesý ótip jatyr. Karantin shekteýlerine bailanysty esep berý onlain ótip jatyr, degenmen kelip qoiatyn suraǵym bar degen turǵyndarmen tikelei kezdesý uiymdastyryp jatyrmyz», - dedi A. Kólginov «Astana» telearnasyna bergen ekskliýzivti suhbatynda.
Sondai-aq, qala basshysy 10 aqpan halyq aldynda óziniń esep beretinin málim etti.
«Turǵyndarmen qarym-qatynasty odan ári nyǵaita túsý maqsatynda biz qazir jańa sait ashyp jatyrmyz. Birge.kz dep atalady. Ol sait qala ómirine qatysty barlyq salany qamtidy. Iaǵni densaýlyq saqtaý, bilim berý, qurylys, jol, abattandyrý, gazdandyrý, jańa jumys oryndary jáne taǵy baǵyttar qamtylady. Sait arqyly qala turǵyndary joǵaryda atalǵan salalar boiynsha ózin tolǵandyrǵan saýalyn joldai alady. Sonymen qatar, kótergen máseleni sheshý jolyn da usyna alady. Barlyq saýaldar men usynystar jinaqtalyp, qala biýdjetin qarastyrǵanda eskeriletin bolady», - dedi ol.
