Almaty qalasyndaǵy Ulttyq kitaphananyń akt zalynda «Halyq murasy» atty án, kúi, jyr keshi ótti. Oǵan Ramazan Stamǵaziev, Rymkesh Jumadilova, Erkin Shúkimanov, Uljan Baibosynova, Ardaq Isataeva, Murat Abýǵazy, Amankeldi Kúzeýbai, Órken Dúisen, Sholpan Darjanova, Aigerim Qaramenova jáne taǵy basqa óner qairatkerleri, Qurmanǵazy atyndaǵy Qazaq ulttyq konservatoriiasy Halyq mýzykasy fakýltetiniń stýdentteri qatysyp, qazaqtyń dástúrli ánderin ulttyq mýzykalyq aspaptarmen – dombyramen, qobyzben, sybyzǵymen, shertermen oryndady.
Is-sharanyń maqsaty – qaladaǵy ártúrli jamaǵat ókilderine, islam dinine bet buryp jatqan jastarǵa, shahar turǵyndaryna ata-babalarymyzdan qalǵan rýhani murany dástúrli ánder arqyly nasihattaý bolatyn.
Kontsertti «Ál-Mádina» meshitiniń bas imamy Baqytjan qajy Jańbyrbaiuly ashty. «Bizdiń ata-babalarymyz dindi ǵasyrlar boiy jyrǵa qosyp nasihattady. Aqyndarymyz, jyraýlarymyz ózderiniń ósiet sózderin búgingi kúnge ulttyq aspaptarmen jetkizdi. Bul degenimiz qazaqtyń dástúriniń ishinde din jatqanyn kórsetedi. Búgingi ótkeli jatqan «Halyq murasy» atty án, kúi, jyr keshi – sol babalarymyzdan qalǵan rýhani dástúrdiń jalǵasy» dedi ol.
Sahnada óner kórsetken árbir ánshi kórermenderdiń zor yqylasyna bólenip otyrdy. Kópshiliktiń kóńilinen shyqqan keshti Qurmanǵazy atyndaǵy Qazaq ulttyq konservatoriiasy «Halyq áni» kafedrasynyń meńgerýshisi, Ónertaný doktory Amankeldi Kúzeýbai júrgizdi.
Kontsert aiasynda Ulttyq kitaphana qyzmetkerleri arnaiy kitap kórmesin uiymdastyrdy. Onda qazaqtyń dini men dástúrine qatysty kitaptar qoiyldy.
Is-sharaǵa Almaty qalasynyń ziialy qaýymy, ártúrli dini jamaǵat músheleri, qoǵam qairatkerleri, jastar uiymdary, stýdentter ÚEU jáne BAQ ókilderi qatysady.
Aita keteiik, kontsertti Almaty qalasy Din isteri jónindegi basqarmasynyń tapsyrysy boiynsha «El-shejire» qoǵamdyq qory uiymdastyrdy.
Jasulan Naýryzáliev
