Qazaqstannyń kommýnistik halyq partiiasynyń (QKHP) Mańǵystaý oblysyndaǵy ókilderi Kaspii teńiziniń soltústik bóligine memlekettik turǵyda keshendi ekologiialyq monitoring júrgizýdi usynyp otyr, dep habarlaidy "Ult aqparat".
Kommýnisterdiń málimetinshe, osyǵan deiin birde-bir keshendi zertteý júrgizilmegendikten, akvatoriiadaǵy ekologiialyq máselelerdiń negizgi sebepteri aiqyndalmaǵan. QKHP filialynyń músheleri tabiǵat janashyrlarymen jáne úkimettik emes uiym ókilderimen birlesip, qorshaǵan ortanyń lastanýy men onyń sheshý joldaryn talqylady. Kaspiige munaidyń tógilýi, qoqysqa tolýy jáne zańsyz balyq aýlaý derekteriniń kóbeiýi teńizdiń lastanýyna ákep tireýde.
Partiia músheleri atap ótken aimaqtaǵy ózekti ekologiialyq máseleniń taǵy biri – Aqtaýdan 5-6 shaqyrym jerdegi «Qoshqar ata» qaldyqtar qoimasy. Qazirgi tańda kóldiń betine 30 jyl boiy úzdiksiz tógilgen ýly zattardyń saldarynan 105 million tonna qatty qaldyq jinalǵan. Ol aýaǵa tarap, jaqyn mańdaǵy turǵyndar men sonda jaiylatyn maldyń densaýlyǵyna ziian keltirýde.
«Úshinshi másele, bizdiń qalanyń irgesindegi Qoshqar ata kóli, onyń radiatsiialyq sebepteri jáne qazir 1989 jyldan beri toqtap turǵan HGMZ siiaqty zaýyttardyń aǵyndy sýlary kólge túspese de, qazir ekologiialyq problemalary óte úlken qaýip tóndirýde. Jalpy turǵyndarǵa, qorshaǵan ortaǵa qaýpi óte orasan. Osy máselelerdi talqylap, ózimizdiń halyqtyq depýtattar arqyly úkimetke jetkizý negizgi maqsatymyz», - dedi Qazaqstan kommýnistik halyq partiiasy Mańǵystaý oblystyq filialynyń 1-shi hatshysy Roza Mahambetova.
