Halyq qatty sharshady. Bárinen. Devalvatsiiadan, korrýptsiiadan, bitpeitin reformadan, nátijesiz bastamalardan, qymbatshylyqtan, ádiletsizdikten, zańsyzdyqtan.
Qazir adamdar tipti ailyq alǵan sáttiń ózinde qýana qoimaidy. Óitkeni ol ailyq alǵanda "aqshany ekinshi ailyqqa deiin qalai jetkizemin" degen ýaiymmen alady. Kóbisi ony birinshi aptada-aq nesiege, alǵan qaryzy men páter aqysyna berýge májbúr. Bylaisha aitqanda birinshi qolmen alyp, ekinshi qolymen ózgege beredi. Ol ai saiyn qaitalanatyn daǵdyǵa ainalǵan. Bul halyqty mezi qyla ma? Mezi qylady! Ómirden túńildire me? Túńildiredi!
Halyq qazir ailyqtyń, zeinetaqynyń, shákirtaqynyń óskenine qýanbaidy. Tipti óspese eken dep tileidi. Óitkeni ailyq ósse, artynsha naryqtaǵy baǵa eki ese ósedi. Bul halyqty ashýlandyra ma? Ashýlandyrady!
Halyq qazir "eshqandai reforma jariialanbasa eken" dep tileidi. Óitkeni milliondardyń ómirin ózgertýge tiis reformalar tek júzdegen adamdy baiytyp qana qoiatynyn biledi. Bul halyqtyń bolashaqtan úmitin úzdire me? Úzdiredi!
Halyq qazir bilimge, ǵylymǵa umtyla qoimaidy. Óitkeni IQ-iń sumdyq bolsa da, bai balasy sóileitinin, talantyń ǵajap bolsa da, baǵlan balasy bilep, tósteitinin biledi. Aqshasy bar nadan, aqshasy joq rýhani adamnan joǵary. Kókesi joqtar keleshekten bir ǵajapty kútýdi qoiǵan.
Aita berse kóp árine. Biz damyǵan 30 eldiń qataryna kiremiz deimiz. Sóite tura sol damyǵan elderdiń basty qaǵidasyn umytamyz: Ol bilik pen halyq arasyndaǵy ashyq dialog jáne jinalǵan máselelerdiń ýaqytynda sheshilýi. Bizde ázirge tek máseleler jinalyp jatyr. Halyqtyń áleýmettik máselesin sheshpegen el, sol halyqtyń ashýynan qulap tynady. Ony tarih talai dáleldegen.
Bilik mynany túsiný kerek: Qazaq ulty óz memleketine, biligine jaý emes, ol tek qana óz elindegi olqylyqtardy jóndeý úshin shyr-pyr bolady. Bolǵany sol. Al eger qoǵamda túrli sipattaǵy negativ kóbeise, onda ol kezinde qabyldanǵan qate sheshimderdiń býmerang bolyp búgin oralýy. Sondyqtan shynaiy áleýmettik reforma jasaityn ýaqyt keldi. Búgingi kúni halyqty odan basqa eshteńe serpilte almaidy. Qarny ash, baspanasy joq halyq rýhani jańǵyrmaidy.
Ashat Qasenǵalidiń feisbýktegi jazbasynan
