QMDB tóraǵasynyń orynbasary Ershat Ońǵarov bul týraly búgin QR Prezidenti janyndaǵy Ortalyq kommýnikatsiialar qyzmetinde «Halyq arna» telearnasynyń jumysyna qatysty ótken onlain brifing barysynda aitty, dep habarlaidy baq.kz portaly.
QMDB tóraǵasy, bas múfti Naýryzbai qajy Taǵanulynyń bastamasymen, 2020 jyldyń 3 qarashasynda múftiiattyń tól arnasy «Halyq arnanyń» ashylǵanyn zor qýanyshpen jetkizemin. Dini basqarmanyń tól arnasyn ashý jyl basynan qolǵa alynyp kele jatqan is. Osy baǵytta birqatar jumys atqaryldy. «Halyq arnanyń» múftiiattyń 30 jyldyǵy qarsańynda ashylýynyń ózindik máni bar. Qazir múftiiattyń media salasyndaǵy áleýeti jyldan-jylǵa jetilip keledi. 30 jyl merzim ishinde «Iman» jýrnaly jáne «Munara» gazeti oqyrmanǵa jol tartty. Búginde QMDB qarasty 21 sait jumys isteidi. Budan bólek, múftiiattyń janynan ashylǵan «Hikmet» teleradiostýdiiasy bar. Dini, rýhani baǵyttaǵy aýdio, video ónimderin jamaǵatqa on jyldan beri usynyp keledi, - dedi ol.
Ershat Ońǵarov «Halyq arna» telearnasynyń jeke ǵimarat, materialdyq-tehnikalyq qajettiliktermen jabdyqtalǵanyn atap ótti. Arna «Otaý tv», «ID TV» tsifrlyq arnasy arqyly eldiń túkpir-túkpirine taratylady.
«Halyq arna» tek dini mazmundaǵy telebaǵdarlamalarmen shektelmeidi. Biz efir baǵytyn islam dininiń durys tanymyn jetkizý, asyl qundylyqtaryn dáripteýmen qatar, tarihi taǵylymdyq jaǵyna, qazaqy salt-dástúrge basymdyq beremiz. Efirdi sapaly kontentpen toltyrý ońai emes ekeni málim. Sol úshin arnaiy jobalar men talǵampaz kórermenniń oiynan shyǵatyn baǵdarlamalar daiyndalyp jatyr, - dedi ol.
QMDB tóraǵasynyń orynbasary brifing barysynda QMDB tuǵyrnamasy islam dininiń negizderi, shariǵat sharttary jáne minez-qulyqqa qatysty úsh úlken bólikti qamtitynyn atap ótti.
QMDB osy kúnge deiin úsh ret imamdar forýmyn ótkizdi. Osy forýmda dini basqarmanyń jumysyna qajetti kontseptýaldyq qujattar qabyldady. Soǵan toqtalar bolsam, birinshi QMDB tuǵyrnamasy qabyldanǵan bolatyn. Ol islam dininiń negizderi, shariǵat sharttary jáne minez-qulyqqa qatysty úsh úlken bólikti qamtydy. «Rýhani qundylyqtar – qoǵam birliginiń negizi» atty III respýblikalyq imamdar forýmynyń aiasynda QMDB uiymdastyrýshylyq-ideologiialyq qyzmetine jańa serpin beretin birqatar mańyzy bar tujyrymdamalyq qujat qabyldandy. Ol «Jeti rýhani qazyq» Qazaqstan musylmandarynyń rýhani tuǵyrnamasy» dep ataldy. Musylmannyń boiynan tabylýy kerek barlyq igi qasietterdiń barlyǵy osy «Jeti rýhani qazyqtyń» tóńireginde toptastyryldy, - dedi ol.
Ershat Ońǵarov atalmysh qujat sheńberinde imandy, otanshyl, bilimdi, aýyzbirshilik, eńbekqor, mádenietti, ádildik syndy qasietti 7 uǵymdy halyqqa keńinen túsindirý qarastyrylǵanyn jetkizdi.
Adamdy kemeldikke jeteleitin osyndai qasietter qazirgi qoǵamda asa qajet. Din men rýhaniiat qustyń qos qanatyndai adamǵa asa qajet element bolǵandyqtan, QMDB-nyń osy salada jumys atqaratyn qyzmetkerlerine asa kerek jáne osy qasietter boiynan tabylsa, biz qoǵamǵa aýyzbirshilikti, yntymaqty, eńbekqorlyqqa baýlý, úlkenge qurmet, kishige izet kórsetý siiaqty qasietterdi sińire alamyz dep senemiz, - dedi ol.
