Dimash Qudaibergen qazaqstandyq mýzykant Imanbek Zeikenovti "Gremmi" syilyǵyn jeńip alýymen quttyqtady, dep habarlaidy "Ult aqparat".
"Altyn baýyrym, úlken jeńisiń qutty bolsyn! Óz talantyńmen bizdiń halqymyzdyń mártebesin kóterip tastadyń! Búgingi bul juldyzdy sátiń áli talai uzaq jyl boiy seni alǵa jetelei bersin! Naǵyz qazaqtyń DJ, án óńdeýshisi bolsa, sendei-aq bolsyn! Sharshama, talma, samǵa! Jaraisyń", - dep jazdy Dimash Qudaibergen.
Aita keteiik, qazaqstandyq mýzykant jáne didjei Imanbek Zeikenov "Gremmi" syilyǵyn jeńip aldy.
"Mýzykanttyń karerasyndaǵy eń tamasha jetistik – Grammy jeńip alý, biz oǵan qol jetkizdik!", - dep jazdy Imanbek Instagram paraqshasynda.
Pavlodar mańyndaǵy Aqsý qalasynda turatyn Imanbek Zeikenov buǵan deiin temirjolda jumys istedi. Bala kúninen mýzykamen áýestengen, ákesi gitara tartýdy úiretken.
Imanbek SAINt JHN oryndaityn Roses ánine remiks jasaǵannan keiin tanymal boldy. Remiks YouTube jelisinde 234 millionnan astam qaralym jinady.
