Tungi Habar baǵdarlamasynyń juma kúngi qonaqtary qonys toiyn toilaýda. Bul joly aýtizm diagnozy bar úsh balany jalǵyz tárbielep otyrǵan ana óz úiiniń baqytty iesi atandy, dep habarlaidy QazAqparat atalǵan telearnanyń baspasóz qyzmetine silteme jasap.
Belgili bolǵandai, balalardyń ákesi 9 jyl buryn qaitys bolǵan. Osy ýaqytqa deiin Gúlnár Qaldybaeva balalarymen birge jaldamaly páterlerde turýǵa májbúr boldy. Qaiyrymdylyq qoryna kómek surap kelgen áielge «Habar» telearnasynyńtikelei efirinde Almaty qalasyndaǵy jeke páterdiń kilti men jihaz satyp alýǵa arnalǵan sertifikat tabystaldy.
Esterińizge sala keteiik, buǵan deiin Tungi Habar baǵdarlamasynyń telekórermenderi kórý qabileti buzylǵan anasyna qolqanat bolyp otyrǵan 10 jasar balanyń júrek eljireter oqiǵasynyń kýágeri boldy. Qańtar aiynda telearnanyń tikelei efirinde «Habar» Agenttigi men «Hareket» qaiyrymdylyq qorynyń atynan balaǵa páter berildi.
Bul bastama «Habar» telearnasyndaǵy keshki shoýdyń juma kúngi shyǵarylymdarynda igi dástúrge ainalady dep josparlanýda.
- Is-shara «Berekeli juma» dep atalady. Juma - musylmandar úshin qasietti kún. Biz apta saiyn Tungi Habar baǵdarlamasynyń shyǵarylymdarynda osyndai tosynsyilar jasaýdy josparlaýdamyz. «Hareket» qorynyń arqasynda muqtaj qazaqstandyqtar ǵa «Habar» arnasynyń tikelei efirinde kómek kórsetiledi, -dedi «Habar» Agenttigi Basqarma Tóraǵasynyń mindetin atqarýshy Rinat Kertaev.
«Habar» telearnasyndaǵy jańa joba osy jyldyń qańtar aiynda bastalǵan bolatyn. Baǵdarlama kún saiyn saǵat 22:30-da tikelei efirde kórsetiledi. Tungi Habar shoýynyń júrgizýshileri - teatrdyń tanymal akterleri Madiiar Serikbaev pen Janbolat Naizabekov.
