Qazaqstannyń fýtbol federatsiiasy ulttyq quramasynyń bas bapkeri Aleksandr Borodiýkpen kelisimshartty toqtatty, biraq bul jaily resmi málimdeme jasaýǵa asyqpai otyr, dep habarlaidy «Sportinform» SAA tilshisi.
Borodiýk budan birneshe kún buryn qyzmetinen bosatylǵan, biraq federatsiia basshylyǵy bul aqparatty jariialaýǵa asyqpai otyr. Elimiz fýtbolynyń bas organy osy aqparatty jurtshylyqqa qandai formada jetkizý jaǵyn oilastyryp jatqan bolar. Jýyq arada «Borodiýk otbasy jaǵdaiyna bailanysty qyzmetinen ketti» nemese «Nátije kórsete almaýyna bailanysty bosatyldy» degen aqparattar taralýy múmkin. Árine, áý basta reseilik mamannyń aldyna eshqandai týrnirlik mindettemeler qoiylmaǵany, tek urpaqtar almasýyn júrgizip, qurama komandany kelesi irikteý kezeńine daiyndaý talap etilgeni belgili.
Borodiýktiń Qazaqstan quramasyndaǵy taǵdyry jeltoqsan aiynyń sońynda, ony quramaǵa shaqyrýǵa bastamashyl bolǵan federatsiianyń burynǵy bas hatshysy Qanysh Áýbákirov qyzmetten ketýge ótinish bergen kezde-aq belgili bolǵan. Onyń ornyna kelgen Azamat Aitqojin reseilik mamannyń eńbek demalysynan kelýin kútetinin aitqan bolatyn.
Aita ketelik, A. Borodiýktiń kelisimsharty 2019 jyldyń aiaǵyna deiingi merzimdi kózdeidi. Eger QFF ony óz bastamasymen buzatyn bolsa, bapkerge aitarlyqtai mólsherde ótemaqy tólenedi.
