Gennadii Golovkin 17 qyrkúiekte Las-Vegasta ótkizgeli otyrǵan meksikalyq Saýl Kanelo Alvareske qarsy úshinshi jekpe-jegine qatysty pikir bildirdi, - dep habarlaidy Tengrinews.kz agenttigi Vesti.kz saityna silteme jasap.
"Kúres josparym men strategiiam bar. Jekpe-jek eki boksshydan turady. Kanelo eń aldymen ne usynatynyn kóreiik. Men kez kelgen jaǵdaiǵa daiynmyn. Ol jaqyn qashyqta judyryqtasqysy kelse, solai bolady, ol alys qashyqty kózdese, alystan bolady. Bul jekpe-jekti eki sportshy jasaitynyna senimdimin. Jekpe-jekte ártúrli bólikte kim jaqsy kórinetinin kóreiik", - dedi Golovkin The Fight with Teddy Atlas podkasynda.
Sondai-aq, GGG qazirgi jattyqtyrýshysy Djonatan Benks pen burynǵy jattyqtyrýshysy Abel Sanchestiń jumysyn salystyrdy. 2019 jylǵy sáýirde Golovkin toǵyz jyldyq yntymaqtastyqtan keiin Sanchesten ketip, Benksti óziniń jańa tálimgeri retinde tańdaǵan.
"Bul eki jekpe-jekti úshinshi jekpe-jekpen salystyrý durys bolmaidy, óitkeni ýaqyt ártúrli. Meniń eki jattyqtyrýshymnyń qadir-qasietin tómendetkim kelmeidi, olar - men úshin óte jaqsy mamandar", - dedi ol.
Eske salaiyq, Golovkin men Kanelonyń úshinshi jekpe-jegi 17 qyrkúiekte ótedi. Kezdesý Las-Vegastaǵy (Nevada, AQSh) T-Mobile Arena-da ótedi. Buǵan deiin olardyń jekpe-jeginiń birinshisi daýly teń nátijemen aiaqtalsa, ekinshisinde tóreshilerdiń sheshimimen meksikalyq boksshy jeńiske jetken edi.
