Qazaqstannyń Tuńǵysh Prezidenti týraly Qazaq - The History of Golden Man filmin jasaýshylardyń biri Oliver Stoýn Nursultan Nazarbaevpen suhbatynda qandai basty suraqtarǵa jaýap alǵysy keletinin aitty, - dep habarlaidy Tengrinews.kz.
"Qatelespesem, Qazaqstanǵa eki ret saparmen bardyq. Men Nazarbaevqa kez kelgen suraq qoia alatynyma kóz jetkizdim. Ásirese Resei, Qytai jáne AQSh arasyndaǵy tepe-teńdikke qatysty. Búgingi álemdik tártipte bul óte mańyzdy nárse. AQSh Qytai men Reseige qas, buǵan barǵan saiyn kózimiz jetip jatyr. Maǵan álemdegi kúshterdiń tepe-teńdigi týraly bilý qyzyqty boldy.
AQSh álemdi basqarsa, bul bárine qaýipti jaǵdai bolady. Nazarbaevtyń da álemdegi osy teńdikti qalaitynyn kórip otyrmyn. Ol osy tepe-teńdikti kórgisi keledi", - dedi Stoýn OKQ brifinginde.
Ol Qazaqstan - Qytai men Resei arasynda ornalasqan, AQSh-pen tyǵyz qarym-qatynastaǵy asa iri el ekenin aitty. Osy elderdiń árqaisynyń Qazaqstanǵa qatysty óz múddeleri bar.
"Nazarbaev - osy "arqandy jolmen" júre alatyn jáne qandai da bir qaqtyǵyssyz adamdar, halyqtar arasyndaǵy dialogqa jol taba alatyn adam. Ol Ýkraina men Resei arasyndaǵy kelissózderge qatysty. Nazarbaev AQSh-pen de sóilese alady. Gorbachev myrzanyń taǵdyry sheshilgen kezde, ol bilik tranzitin tegisteýde basty ról atqardy. Biz KSRO qulaǵan kezde qatty qaqtyǵystardan qutyla alǵanymyzdy kórdik. Nazarbaev 90-jyldary mańyzdy ról atqardy dep sanaimyn. Onyń AQSh-pen iadrolyq qarýsyzdaný máseleleri jónindegi kelissózderi de mańyzdy. Men qazir Qazaqstannyń qandai jaǵdaida ekenin kórip otyrmyn, men úshin el týraly tolyǵyraq bilý qyzyq boldy", - dep bólisti Oliver Stoýn.
Onyń aitýynsha, qazaqstandyqtar óz eliniń álem bolashaǵy úshin qanshalyqty mańyzdy ekenin túsinbeýi múmkin.
"Qazaqstanda talantty adamdar kóp. Bul - óte progressivti el. Biz ótken ǵasyrdyń 90-jyldarynyń basynan búginge deiingi Qytaidaǵy siiaqty, Qazaqstandaǵy úlken ózgeristerdi kórip otyrmyz. Amerikalyq sarapshylar bul týraly biledi jáne Qazaqstandy odaqtas retinde kórgisi keledi, biraq bul Resei men Qytaiǵa qandai da bir dárejede qarsy shyqqan bolýy múmkin. Sondyqtan Qazaqstan barlyq osy protseste mańyzdy ról atqarady. Qazaqstan barlyq seriktesimen dostyq qarym-qatynasta. Men únemi aitamyn, biz bir-birimizben kúresýdiń ornyna klimattyń ózgerýin jeńý úshin birge jumys jasaýymyz kerek, áitpese bul jaqsylyqqa ákelmeidi. Jalpy, diplomatiia qurylymyn ózgertý kerek", - dedi ol.
Eske salaiyq, amerikalyq kinorejisser, stsenarist jáne prodiýser, úsh "Oskar" syilyǵynyń iegeri Oliver Stoýn Nursultan Nazarbaevtan Qazaq - The history of Golden Man jańa filmin túsirý úshin suhbat alǵan bolatyn. Filmniń rejisseri - ýkrainalyq jáne amerikalyq kinoindýstriianyń qairatkeri Igor Lopatenok, filmniń mýzykasyn "Altyn globýs" iegeri kompozitor Karlo Siliotto, al mýzykasyn "Astana Opera" simfoniialyq orkestriniń ártisteri oryndady.
"Sizder Nazarbaevty qalaýyńyz boiynsha diktator, myqty adam, tiran nemese quryltaishy dep atai alasyz. Biraq sońynda keńes imperiiasynyń kúireýi jáne eldiń táýelsizdikke, onyń ishinde iadrolyq qarýdan bas tartýǵa mańyzdy qadamy týraly oiyn aitatyn qarapaiym adamdy kóresiz... Sondai-aq, Nazarbaev Qazaqstannyń kóshpeli tarihy men Eýraziianyń tehnologiialyq bolashaǵy týraly áńgimeleidi. Meniń oiymsha, bul - jarqyn bolashaq", - dedi Stoýn.
Oliver Stoýn - amerikalyq rejisser, stsenarist jáne prodiýser. Úsh "Oskar" syilyǵynyń iegeri. Ol "Ýoll-Strit", "Kajdoe voskresene", "Aleksandr" jáne "Prirojdennye ýbiitsy" siiaqty filmder túsirgen.
2017 jyly Oliver Stoýn tórt bólimnen turatyn "Pýtinmen suhbat" derekti filmin túsirdi.
