QR Premer-Ministriniń orynbasary Imanǵali Tasmaǵambetov 1916 jylǵy ult-azattyq kóterilisiniń batyry – Keiki batyrdyń súiegin jerleý máseleleri jóninde kezekti jumys keńesinde tutas bir ulttyń namysyn arqalaǵan aqberen qolbasshynyń bas súieginiń elge qaitarylýy eldigimiz ben erligimizdi pash etken igilikti is ekenin basa aitty.
Halyq aýzynda Keiki batyr atymen tanymal Nurmaǵanbet Kókembaiuly – 1916 jylǵy Resei patshalyǵynyń qazaqtan áskerge adam alý týraly jarlyǵyna qarsy kóterilgen Torǵai qazaqtary kósemderiniń biri. Ol kóterilisshilerdiń negizgi qarýly kúshi – mergender jasaǵyn basqarǵan.
Eske sala ketsek, 6 qazan kúni Keiki batyrdyń bas súiegi Reseiden Qazaqstanǵa jetkizildi. Ol 93 jyl boiy Sankt-Peterbýrg qalasyndaǵy Kýnstkamerada saqtalyp keldi.
Batyrdyń aty men erligin barynsha dáriptep, onyń denesin salt-dástúrimizben arýlap jerleý qabyrǵaly halyq, irgeli el ekendigimizdiń kórinisi. Sondyqtan, Imanǵali Tasmaǵambetov Keiki batyrdyń denesin jerleý rásimin uiymdastyrý jónindegi naqty is-qimyl josparyn qurý mańyzdy ekenin atady.
Degenmen, arada batyrdyń bas súiegine ketpen tigen sekildi qańqý sózder de aitylyp qalǵany ras. Antropologiianyń búge-shigesine deiin zertteitin vengrlik ǵalymdardyń málimetinshe, Keiki batyrdyń bas súiegine balta, ne, aýyr semser sekildi qarýdyń zaqym keltirgeni anyqtalyp otyr. Bul turǵyda Semmelveis ýniversitetiniń (Býdapesht qalasy) radiologiia jáne onkoterapiia klinikasynda bassúiektiń jáne jaq súieginiń kompiýterlik tomografiiasy jasaldy.
Bir nárse anyq, batyrdyń bas súiegi máiiti tabylǵan kezde jerlenedi, denesin izdeý L.Gýmilev atyndaǵy Eýraziia Ulttyq Ýniversitetine júktelip otyr.
Keńes barysynda Imanǵali Tasmaǵambetov Mádeniet jáne sport ministrligine Qostanai oblysynyń ákimdigimen birlesip Keiki batyrdyń kesenesin jobalaý jáne odan ári qurylysyn júrgizý úshin qajetti barlyq sharalardy qabyldaý jóninde tapsyrma berdi.
Vitse-premer halqymyzdyń rýhy men mártebesin kóterý turǵysynda osynaý jobanyń tarihi mańyzyna erekshe toqtalyp, ony júzege asyrý úshin quzyrly mekemeler jáne qoǵam ókilderimen birlesip is-qimyl jasaýǵa daiyn ekenin málimdedi.
Sonymen qatar, kitaptar, pesa jazylyp, kóptegen is-sharalar ótkizý josparlanyp otyr.
Ǵalymjan Sársen,
Ult portaly
