Qazaqstan Respýblikasynyń Ortalyq memlekettik mýzeii qyzmetkerleri Keiki batyrdyń bas súiegi qalai saqtaýly turǵanyn kórsetti. Bul týraly kaz.tengrinews.kz habarlady. Mýzei direktorynyń orynbasary Beibitqali Qaqabaevtyń aitýynsha, mýzeidegiler Keiki batyr jetkizilgen arnaiy konteinerdi ashpaǵan.
Sonymen qatar, mýzeide Keiki batyrdyń bassúiegin qoiatyn arnaiy bólmeniń bólingeni belgili boldy. Dóńgelegi bar konteiner bólmeniń ortasynda ornalasqan. Konteiner qyzyl matamen oralyp, maisham qosylǵan.
“Konteinerdiń ishin biz eshkimge kórsetken joqpyz. Ol barlyǵyna kórsetýge bolatyn qandai da bir zat emes, ol – adamnyń bassúiegi. Sondyqtan biz ony ashpaýǵa tyrysamyz. Jýyrda, iaǵni 1-2 kúnniń ishinde biz Keiki batyrdyń bassúiegin Vengriiaǵa saraptamaǵa jiberemiz. Qazir qajetti qujattar rásimdelip jatyr”, – dedi Beibitqali Qaqabaev.
“Vengriiada bizdiń maqsatymyz – ǵylymi jáne genetikalyq zertteýler júrgizý. Keiin elektrondyq tehnologiialarmen súiekterdi qaita qalpyna keltirip, Keiki batyrdyń pishinin kórýge bóledi. Vengriiada ǵalymdar mundai zertteýlermen jaqsy ainalysady. Olarǵa bul zertteý qyzyq bolady, sebebi olar ózderin qypshaq sanaidy”, – dedi Qaqabaev. Sondai-aq, ol zertteýlerdiń bes aiǵa sozylýy múmkin ekenin aitty. Al keiinirek Keiki batyrdyń bassúiegi qaitarylyp, Qostanai oblysynda jerlenetin bolady.
Sonymen qatar, Antropologiia jáne etnografiia mýzeiiniń qyzmetkerleri túsirgen jádigerlerdiń sýretteri paida boldy. Ol sýretter Kýnstkameradaǵy muraǵatta 90 jyldan asa ýaqyt saqtalǵan eken.
Sondai-aq, memlekettik mýzei qyzmetkerleri Kýnstkameradaǵy jádigerlerdi qalai alǵandaryn aityp berdi.
“Bastapqyda Reseidegi mýzeidiń muraǵatynda saqtaýly turǵan bassúiekti tarihi-mádeni qundylyǵy joq dúnie dep sanaldy. Sol ýaqyttan beri ol jádiger retinde emes, adamnyń bassúiegi esebinde saqtaýly turǵan. Keiinnen saqtaýly turǵan bassúiek bizge jetkizildi”, – dedi QR Ortalyq memlekettik mýzeidiń qyzmetkerleri.
Munyń aldynda Ortalyq memlekettik mýzeidiń direktory Nursan Álimbai 12 qazan kúni Keiki batyrdyń bas súiegi antropologiialyq saraptama úshin Vengriiaǵa jetkiziletinin málimdegen bolatyn.
.jpeg)