Qazaqstanhalqyna.kz saity iske qosylǵannan beri «Qazaqstan halqyna» qoryna 13 myńnan astam ótinish kelip túsken. Jalpy, búginde Qorda 115 milliard teńgeden astam qarajat jinaqtalǵan. Shuǵyl áreket etýdi talap etetin máseleler boiynsha saraptamalyq komitetter jumys istep tur, dep habarlaidy QazAqparat.
Sonymen qatar, sait pen áleýmettik jelidegi messendjerlerge úi, kólik satyp alý, nesie jáne basqa da qarjylyq zaimdar boiynsha mindettemelerdi tóleý, otbasylyq is-sharalar men merekelik sharalardyń qarajatyn óteý týraly ótinishter áli de túsýde.
Eske salaiyq, qamqorshylyq keńesi «Qazaqstan halqy» qorynyń negizgi mindetterin kórsetetin tujyrymdamany bekitti.
Osylaisha, qujatqa sáikes, qordyń qyzmeti bolashaqta aýrýlardyń jáne múgedektiktiń yqtimal damýyn boldyrmaý maqsatynda sábilerge meditsinalyq qyzmet kórsetýdi damytýǵa jáne onyń qoljetimdiligin arttyrýǵa járdemdesýge, sport jáne bilim berý infraqurylymy, sondai-aq balalarǵa arnalǵan basqa da áleýmettik mańyzy bar qyzmetteriniń qoljetimdiligin arttyrýǵa baǵyttalǵan.
Sondai-aq, qor múgedek, naýqas nemese áleýmettik beiimdelý problemalary bar balany asyrap alǵan, qorǵanshylyq nemese patronattyq tárbieni uiymdastyrǵan otbasylarǵa kómek kórsetýmen jáne az qamtylǵan otbasylardaǵy balalarǵa kómek kórsetý úshin mekteptermen ózara is-qimyl jasaýmen ainalysady.
Sonymen qatar, tizimge Qazaqstannyń aýmaqtyq tutastyǵy men qaýipsizdigin qorǵaý nemese adamdardyń ómirin saqtap qalý jáne zardap shekken turǵyndarǵa kómek kórsetý kezinde qaitys bolǵan nemese aýyr jaraqat alǵan quqyq qorǵaý organdary, arnaiy organdar, UQK qyzmetkerleriniń otbasylaryna, áskeri qyzmetshilerine, tótenshe jaǵdailar kezinde zardap shekken adamdarǵa qoldaý kórsetý kiredi.
«Bul qyzmet baǵyttaryn qamqorshylyq keńes bekitti, al basqa salalar qor qyzmetindegi basym baǵyttarǵa jatpaidy. Sondai-aq, biz azamattardyń qarjylyq problemalary bolýy múmkin ekenin túsinemiz. Alaida bul máselelerdiń barlyǵyn Qor sheshe almaidy. Sondyqtan tujyrymdamada kórsetilgen qyzmet baǵyttaryn muqiiat oqyp shyǵýyńyzdy suraimyz», - dedi «Qazaqstan halqyna» qorynyń resmi ókili Álibek Ábdilov.
