Senattyń jalpy otyrysynda Ekologiia, geologiia jáne tabiǵi resýrstar ministri Maǵzum Myrzaǵaliev qoǵam ókilderi qorshaǵan ortaǵa áserdi baǵalaýdyń barlyq kezeńderine qatysa alatyndyǵyn aitty, dep habarlaidy QazAqparat.
«Sonymen qatar, qoǵam ókilderi qorshaǵan ortaǵa áserdi baǵalaýdyń barlyq kezeńderine qatysady. Mindetti túrde birinshi sanattaǵy obektilerdiń qorshaǵan ortaǵa áseri baǵalanady. Al ekinshi sanattaǵy obektiler skriningten ótedi. Iaǵni, qorshaǵan ortaǵa áserdi baǵalaýdy júrgizý qajet nemese qajet emes ekendigi anyqtalady. Úshinshi sanattaǵy obektiler boiynsha deklaratsiia qabyldanady (qoimalar, jihaz tsehtary, beton óńdeý toraptary jáne qyzmeti jergilikti, qorshaǵan ortany lastaýdyń eleýsiz sipatyndaǵy ózge de obektiler)», - dedi ministr QR Ekologiialyq kodeksiniń jobasyn talqylaý kezinde.
Onyń aitýynsha, tórtinshi sanattaǵy obektiler retteýden tolyq bosatylǵan (avtojýý, TQO, qoǵamdyq tamaqtaný obektileri, qýattylyǵy az qazandyq qondyrǵylary bar mikrobiznes obektileri).
«Qorshaǵan ortaǵa emissiialar jáne tabiǵat qorǵaý is-sharalaryna biýdjet qarajatynyń maqsatty jumsalýy úshin tólenetin tólem boiynsha kelesini aita ketý qajet. Qazirgi ýaqytta qoldanystaǵy zańnama boiynsha tabiǵatty qorǵaý is-sharalaryna emissiia úshin túsken tólemderdi maqsatty jumsaý mindettelmegen. Saldarynan jergilikti atqarýshy organdar kelip túsetin qarajattyń tek 45 paiyzyn ǵana qorshaǵan ortany qorǵaýǵa bóledi desek bolady. Keibir oblystarda tabiǵat qorǵaý is-sharalaryna arnalǵan shyǵys 10 paiyzdan aspaidy. Osyǵan bailanysty, zań jobasynda jergilikti atqarýshy organdar túsetin ekologiialyq tólemderdin esebinen 100 paiyz kóleminde qarjyny tabiǵat qorǵaý is-sharalaryna bólýge mindetti ekendigi kórsetilgen», - dedi Myrzaǵaliev.
