Qazaq estradasynda esti ánder eleýsiz qalyp, eser ánder elitip bara jatqany burynnan aitylyp kele jatyr. Alaida aita bergennen qulaqtan kirip, boidy alatyn tereń áýezdi, mándi-maǵynaly ánder kóbeie qoimady. Kerisinshe uiqasy shala, maǵynasy saiaz, tipti beiádep ánder sahnany jaýlap bara jatqandai.
Ánniń sózderi tym tómendep ketkeni tyńdarmannyń kinási me, álde suryptap, elekten ótkizbeýdiń kesirinen sahnany osyndai ánder jaýlap bara jatyr ma degen suraq aqyn Erǵali Baqashty jii tolǵandyrady eken.
«Buǵan tyiym salyp, ózgerister engizip, toqtatpasa aldaǵy ýaqytta budan da soraqy nebir sózderi bar ánder shyǵyp ketýi, halyqqa tarap ketýi ǵajap emes. Sondyqtan jeńil-jelpi ánder tek toilar men restoran-kafelerde ǵana aitylyp, úlken sahnalarda mundai ánderge tyiym salynýy kerek dep oilaimyn», -dedi Erǵali Baqash ULT.KZ tilshisine.
Ánshilerdiń de talǵamy sonshalyqty tómen be?
Osydan birneshe jyl buryn ánderdiń sózderi jutań, uiqasy nashar desek, endigi ánderdiń mátinderin aqyn tipti taldap ta bere almaitynyn aitady.
Biz oǵan KALIFARNIYA esimdi ánshiniń «Pýerto-Riko» atty ánin usynǵan edik:
«Sen meniń zaiybym
Men seniń aiǵyryńmyn
Bastaldy
Pýerto-Rikodaǵy qyzǵa bas ketedi
Nege?»
«Bul qandai sóz?! Muny oqyǵan adam da, oqymaǵan adam da qalai túsinedi? Mynany halyqqa ne dep túsindiresiń? Muny qolyńa mikrofon alyp, qaitip aityp turasyń?! Ánshilerdiń de talǵamy sonshalyqty tómen be dep oilaisyń... Mundai ánderdiń sahnada aitylýyna óz basym qarsymyn. Bul óleńderdi taldaýdyń ózine kelmeidi ǵoi. Áiteýir jeńil sózdermen uiqastyrylǵan, adamdy esh oilandyrmaityn, ne bir tyńdap ta áserlenbeitin sózderden quralǵan mátinder ǵoi. Buny ne dep taldap, ne dep keltiresiń?! Buryn sazgerler men aqyndar ózara shyǵarmashylyq tereń bailanysyp, ánder týýshy edi. Ol ánder osy kúnge deiin ómirsheń. Al qazir osyndai beiádep ánder sahnada shyrqalady», - dep kúiindi aqyn Erǵali Baqash.
Ádepten ozǵan aqyndar men ánshiler kóbeidi
Hákim Abaidyń ózi óleńderinde «Ádepten ozbaiyn, kóp sóilep sozbaiyn» deitin edi, al qazir radiodan - bir, teledidardan - eki, áleýmettik jelilerden – úsh: «Ketti, laqty, ol tyńdamaidy» dep shyrqap jatqan Qanai esimdi ánshiniń daýysyn estisiń.
Burynǵynyń áninde (Aqan seriniń «Balqadisha» áni, red.) «Ishinde qara basyń, pa, shirkin, han Qadisha!» dep aqyn qyzdyń sulýlyǵyn kórkem teńeýlermen tamsana jyrlasa, qazir «Esimiń Balqadisha emes, Balqiia. Qudasha, bileiikshi, kel, bir partiia» dep, án salyp, «hitke» ainala salady. Bir jyldan keiin bul án umytylyp, toida selkildep bileitin basqa án shyǵady. Mysaly ol ánde «Aq paketpenen, kók paketpenen sarqyttarym da bar» dep, arasynda «Molodets! Krasavchik! Biińmen aiyrdyń» dep qosyp qoiady. Qazir keibir aqyndar emotsiiasyn osylai jetkizse kerek...
Al Qarakesek degen ánshiniń «Don't Leave Me Here» degen áni siiaqty ánderdiń mátinin kórsetýdiń ózi uiat. Sebebi anaiy sózderden kóz súrinedi. Budan mátindi jazǵan adamnyń ishki jan dúniesi qandai kúi keship jatyr eken, osyndai bylǵanǵan uiqas qurý, ony yrǵaqqa qosyp sahnada shyrqaý úshin qandai adam bolý kerek dep qana oilanasyń...
Este bolsa, osydan birneshe jyl buryn «Uiqym kelmeidi» degen ánniń sózi jurttyń kúlkisine qalǵan. Ony oryndaǵan ánshi de, avtor da áleýmettik jeliden de, telearnalar arqyly da aqtalyp baqty. Alaida bul qazirgi ánderdiń mátinine mán qosa qoiǵan joq, ánshilerge sabaq ta bolmady.
«Qazir adamdar sharshaǵan»
Bizdiń suhbattasymyzdyń oiynsha mándi-maǵynaly, uiqasy kórkem, tili shuraily ánder ómirsheń keledi.
Biraq Abaisha aitqanda «kóńilge oi salatyn» ánder nege azaiyp ketti? Aqynnyń pikirinshe halyqtyń talǵamy jeńil-jelpi ánge aýýynyń taǵy bir sebebi, sharshaý, jeńil ánniń yrǵaǵymen kóńil serpiltý.
«Án sózderinen qadir-qasiet ketkeli kóp ýaqyt boldy dep oilaimyn. Ony kózi ashyq, kókiregi oiaý adamdardyń bári biledi. Biraq bul ánder nege ótimdi degen suraq týady. Toilarda bilegenge yrǵaqty áýeni, mýzykasy jaqsy bolýy múmkin. Sondyqtan kóp tyńdalady, kóp aitylady. Sosyn ol ánder jeńil. Qazir bir jaǵynan adamdar da sharshaǵan osyndai jeńil áýenmen, jeńil yrǵaqpen selkildep bilep, kishkene bolsa da kóńilin kótergisi keletin bolýy kerek. Bul - bir. Ekinshi jaǵy, saraptama bolýy kerek dep oilaimyn. Án sózderine qaraityn saraptama jasaityn arnaiy komissiia bolýy qajet. Qazaq radiosynan, telearnalardan jáne sahnadan shyǵatyn ánderge súzgi kerek. Jaraidy toida aitylsyn, kafe, restorandarda aitylsyn. Biraq, úlken sahnaǵa dep suryptap jaqsy ánderdi shyǵarý kerek dep oilaimyn», - deidi Erǵali Baqash.
Uiqasy nashar, tili qurǵaq mátinnen turatyn ánder shyǵa bastaǵanda kózi qaraqty azamattardyń narazylyq bildirgeni ras. Alaida toi biznesi men arzan ataqtyń sońynda júrip, ánshiler mundai ánderden bas tartpady. Nátijesinde haip qýamyn dep, estradadaǵy jańa tolqyn tipti anaiy sózderdi ánderine qoldana bastady. Qazirgi «hit» ánderdi oryndap júrgen jas ánshiler Kalifarniia, Qanai, Qarakesekterdiń artynan qandai býyn keledi eken?
