قازاق ەستراداسىندا ەستٸ ەندەر ەلەۋسٸز قالىپ, ەسەر ەندەر ەلٸتٸپ بارا جاتقانى بۇرىننان ايتىلىپ كەلە جاتىر. الايدا ايتا بەرگەننەن قۇلاقتان كٸرٸپ, بويدى الاتىن تەرەڭ ەۋەزدٸ, مەندٸ-ماعىنالى ەندەر كٶبەيە قويمادى. كەرٸسٸنشە ۇيقاسى شالا, ماعىناسى ساياز, تٸپتٸ بەيەدەپ ەندەر ساحنانى جاۋلاپ بارا جاتقانداي.
ەننٸڭ سٶزدەرٸ تىم تٶمەندەپ كەتكەنٸ تىڭدارماننىڭ كٸنەسٸ مە, ەلدە سۇرىپتاپ, ەلەكتەن ٶتكٸزبەۋدٸڭ كەسٸرٸنەن ساحنانى وسىنداي ەندەر جاۋلاپ بارا جاتىر ما دەگەن سۇراق اقىن ەرعالي باقاشتى جيٸ تولعاندىرادى ەكەن.
«بۇعان تىيىم سالىپ, ٶزگەرٸستەر ەنگٸزٸپ, توقتاتپاسا الداعى ۋاقىتتا بۇدان دا سوراقى نەبٸر سٶزدەرٸ بار ەندەر شىعىپ كەتۋٸ, حالىققا تاراپ كەتۋٸ عاجاپ ەمەس. سوندىقتان جەڭٸل-جەلپٸ ەندەر تەك تويلار مەن رەستوران-كافەلەردە عانا ايتىلىپ, ٷلكەن ساحنالاردا مۇنداي ەندەرگە تىيىم سالىنۋى كەرەك دەپ ويلايمىن», -دەدٸ ەرعالي باقاش ULT.KZ تٸلشٸسٸنە.
ەنشٸلەردٸڭ دە تالعامى سونشالىقتى تٶمەن بە?
وسىدان بٸرنەشە جىل بۇرىن ەندەردٸڭ سٶزدەرٸ جۇتاڭ, ۇيقاسى ناشار دەسەك, ەندٸگٸ ەندەردٸڭ مەتٸندەرٸن اقىن تٸپتٸ تالداپ تا بەرە المايتىنىن ايتادى.
بٸز وعان KALIFARNIYA ەسٸمدٸ ەنشٸنٸڭ «پۋەرتو-ريكو» اتتى ەنٸن ۇسىنعان ەدٸك:
«سەن مەنٸڭ زايىبىم
مەن سەنٸڭ ايعىرىڭمىن
باستالدى
پۋەرتو-ريكوداعى قىزعا باس كەتەدٸ
نەگە?»
«بۇل قانداي سٶز?! مۇنى وقىعان ادام دا, وقىماعان ادام دا قالاي تٷسٸنەدٸ? مىنانى حالىققا نە دەپ تٷسٸندٸرەسٸڭ? مۇنى قولىڭا ميكروفون الىپ, قايتٸپ ايتىپ تۇراسىڭ?! ەنشٸلەردٸڭ دە تالعامى سونشالىقتى تٶمەن بە دەپ ويلايسىڭ... مۇنداي ەندەردٸڭ ساحنادا ايتىلۋىنا ٶز باسىم قارسىمىن. بۇل ٶلەڭدەردٸ تالداۋدىڭ ٶزٸنە كەلمەيدٸ عوي. ەيتەۋٸر جەڭٸل سٶزدەرمەن ۇيقاستىرىلعان, ادامدى ەش ويلاندىرمايتىن, نە بٸر تىڭداپ تا ەسەرلەنبەيتٸن سٶزدەردەن قۇرالعان مەتٸندەر عوي. بۇنى نە دەپ تالداپ, نە دەپ كەلتٸرەسٸڭ?! بۇرىن سازگەرلەر مەن اقىندار ٶزارا شىعارماشىلىق تەرەڭ بايلانىسىپ, ەندەر تۋۋشى ەدٸ. ول ەندەر وسى كٷنگە دەيٸن ٶمٸرشەڭ. ال قازٸر وسىنداي بەيەدەپ ەندەر ساحنادا شىرقالادى», - دەپ كٷيٸندٸ اقىن ەرعالي باقاش.
ەدەپتەن وزعان اقىندار مەن ەنشٸلەر كٶبەيدٸ
حەكٸم ابايدىڭ ٶزٸ ٶلەڭدەرٸندە «ەدەپتەن وزبايىن, كٶپ سٶيلەپ سوزبايىن» دەيتٸن ەدٸ, ال قازٸر راديودان - بٸر, تەلەديداردان - ەكٸ, ەلەۋمەتتٸك جەلٸلەردەن – ٷش: «كەتتٸ, لاقتى, ول تىڭدامايدى» دەپ شىرقاپ جاتقان قاناي ەسٸمدٸ ەنشٸنٸڭ داۋىسىن ەستيسٸڭ.
بۇرىنعىنىڭ ەنٸندە (اقان سەرٸنٸڭ «بالقاديشا» ەنٸ, رەد.) «ٸشٸندە قارا باسىڭ, پا, شٸركٸن, حان قاديشا!» دەپ اقىن قىزدىڭ سۇلۋلىعىن كٶركەم تەڭەۋلەرمەن تامسانا جىرلاسا, قازٸر «ەسٸمٸڭ بالقاديشا ەمەس, بالقييا. قۇداشا, بيلەيٸكشٸ, كەل, بٸر پارتييا» دەپ, ەن سالىپ, «حيتكە» اينالا سالادى. بٸر جىلدان كەيٸن بۇل ەن ۇمىتىلىپ, تويدا سەلكٸلدەپ بيلەيتٸن باسقا ەن شىعادى. مىسالى ول ەندە «اق پاكەتپەنەن, كٶك پاكەتپەنەن سارقىتتارىم دا بار» دەپ, اراسىندا «مولودەتس! كراساۆچيك! بيٸڭمەن ايىردىڭ» دەپ قوسىپ قويادى. قازٸر كەيبٸر اقىندار ەموتسيياسىن وسىلاي جەتكٸزسە كەرەك...
ال Qarakesek دەگەن ەنشٸنٸڭ «Don't Leave Me Here» دەگەن ەنٸ سيياقتى ەندەردٸڭ مەتٸنٸن كٶرسەتۋدٸڭ ٶزٸ ۇيات. سەبەبٸ انايى سٶزدەردەن كٶز سٷرٸنەدٸ. بۇدان مەتٸندٸ جازعان ادامنىڭ ٸشكٸ جان دٷنيەسٸ قانداي كٷي كەشٸپ جاتىر ەكەن, وسىنداي بىلعانعان ۇيقاس قۇرۋ, ونى ىرعاققا قوسىپ ساحنادا شىرقاۋ ٷشٸن قانداي ادام بولۋ كەرەك دەپ قانا ويلاناسىڭ...
ەستە بولسا, وسىدان بٸرنەشە جىل بۇرىن «ۇيقىم كەلمەيدٸ» دەگەن ەننٸڭ سٶزٸ جۇرتتىڭ كٷلكٸسٸنە قالعان. ونى ورىنداعان ەنشٸ دە, اۆتور دا ەلەۋمەتتٸك جەلٸدەن دە, تەلەارنالار ارقىلى دا اقتالىپ باقتى. الايدا بۇل قازٸرگٸ ەندەردٸڭ مەتٸنٸنە مەن قوسا قويعان جوق, ەنشٸلەرگە ساباق تا بولمادى.
«قازٸر ادامدار شارشاعان»
بٸزدٸڭ سۇحباتتاسىمىزدىڭ ويىنشا مەندٸ-ماعىنالى, ۇيقاسى كٶركەم, تٸلٸ شۇرايلى ەندەر ٶمٸرشەڭ كەلەدٸ.
بٸراق ابايشا ايتقاندا «كٶڭٸلگە وي سالاتىن» ەندەر نەگە ازايىپ كەتتٸ? اقىننىڭ پٸكٸرٸنشە حالىقتىڭ تالعامى جەڭٸل-جەلپٸ ەنگە اۋۋىنىڭ تاعى بٸر سەبەبٸ, شارشاۋ, جەڭٸل ەننٸڭ ىرعاعىمەن كٶڭٸل سەرپٸلتۋ.
«ەن سٶزدەرٸنەن قادٸر-قاسيەت كەتكەلٸ كٶپ ۋاقىت بولدى دەپ ويلايمىن. ونى كٶزٸ اشىق, كٶكٸرەگٸ وياۋ ادامداردىڭ بەرٸ بٸلەدٸ. بٸراق بۇل ەندەر نەگە ٶتٸمدٸ دەگەن سۇراق تۋادى. تويلاردا بيلەگەنگە ىرعاقتى ەۋەنٸ, مۋزىكاسى جاقسى بولۋى مٷمكٸن. سوندىقتان كٶپ تىڭدالادى, كٶپ ايتىلادى. سوسىن ول ەندەر جەڭٸل. قازٸر بٸر جاعىنان ادامدار دا شارشاعان وسىنداي جەڭٸل ەۋەنمەن, جەڭٸل ىرعاقپەن سەلكٸلدەپ بيلەپ, كٸشكەنە بولسا دا كٶڭٸلٸن كٶتەرگٸسٸ كەلەتٸن بولۋى كەرەك. بۇل - بٸر. ەكٸنشٸ جاعى, ساراپتاما بولۋى كەرەك دەپ ويلايمىن. ەن سٶزدەرٸنە قارايتىن ساراپتاما جاسايتىن ارنايى كوميسسييا بولۋى قاجەت. قازاق راديوسىنان, تەلەارنالاردان جەنە ساحنادان شىعاتىن ەندەرگە سٷزگٸ كەرەك. جارايدى تويدا ايتىلسىن, كافە, رەستورانداردا ايتىلسىن. بٸراق, ٷلكەن ساحناعا دەپ سۇرىپتاپ جاقسى ەندەردٸ شىعارۋ كەرەك دەپ ويلايمىن», - دەيدٸ ەرعالي باقاش.
ۇيقاسى ناشار, تٸلٸ قۇرعاق مەتٸننەن تۇراتىن ەندەر شىعا باستاعاندا كٶزٸ قاراقتى ازاماتتاردىڭ نارازىلىق بٸلدٸرگەنٸ راس. الايدا توي بيزنەسٸ مەن ارزان اتاقتىڭ سوڭىندا جٷرٸپ, ەنشٸلەر مۇنداي ەندەردەن باس تارتپادى. نەتيجەسٸندە حايپ قۋامىن دەپ, ەستراداداعى جاڭا تولقىن تٸپتٸ انايى سٶزدەردٸ ەندەرٸنە قولدانا باستادى. قازٸرگٸ «حيت» ەندەردٸ ورىنداپ جٷرگەن جاس ەنشٸلەر كاليفارنييا, قاناي, قاراكەسەكتەردٸڭ ارتىنان قانداي بۋىن كەلەدٸ ەكەن?
