Keshe, 4 tamyzda feisbýktaǵy paraqshamda jáne «Qazaq úni» ulttyq portalynda «Kerekýde Keńes áskerleri dáriptelýde» atty syn maqalam jariialanǵan edi. Onda Qazaqstannyń kúntizbesinde joq KSRO áýe desanty áskerleriniń ataýly kúni 2 tamyzda Keńes odaǵy jaýyngerlerin ulyqtaýǵa arnalǵan keshendi eskertkishtiń ashylǵanyn jazǵanbyz.
Dál sol kúni Kerekýdegi Keńes desantshylary QR Prezidenti Q. Toqaevtyń epidemiiaǵa bailanysty jariialaǵan karantin talaptaryn aiaqasty ete otyryp, ortalyq kóshelerde zańsyz sherýge shyqqanyn da aitqanbyz. Maqalada kórsetilgen máseleler jóninde «Ult taǵdyry» qozǵalysynyń oblystyq uiymy jáne otanshyl azamattar Pavlodar oblysynyń ákimi, oblys prokýrory, UQK oblystyq departamenti men oblys politsiia departamentiniń basshylarynyń atyna hat tapsyrdy.
Jurtshylyqtyń narazylyǵyn týdyrǵan eskertkish búgin alynyp tastaldy! Estýimizshe, bul keshendi eskertkish tiisti mekemelerdiń ruqsatynsyz, mamandardyń kelisiminsiz demeýshilerdiń qarjysyna ornatylǵan.
Endi zańsyz sharalardy uiymdastyrǵan «Pavlodar qalasy jáne Pavlodar oblysy boiynsha desanttyq baýyrlastyq» qoǵamdyq birlestiginiń tóraǵasy Vasalii Maslovtyń ústinen qylmystyq is qozǵalsa jáne ruqsat etilmegen sherýge shyqqan qatardaǵy kók telpektiler 15 táýlikke qamalyp, kóshe tazalaý jumystaryna jumyldyrylsa quba-qup der edik. Bálkim, sonda ǵana olar Qazaqstan Respýblikasynyń Zańyn qurmetteýdi úirenedi.
Qoǵam belsendileriniń ótinish-tilekterine sergek qaraǵan jergilikti memlekettik organdarǵa rizashylyq sezimimizdi bildiremiz.
Arman QANI,
Qazaq úni
