BUU Qaýipsizdik keńesi Reseidiń Kerch buǵazyndaǵy jaǵdaidy kún tártibine shyǵarý usynysyn qabyldamai tastady. 26 qarashada ótken shuǵyl jiynda Qaýipsizdik keńesi músheleriniń kóbi Reseidiń "Ýkraina áskeri-teńiz kúshteriniń Resei shekarasyn buzǵany týraly" máseleni talqylaý usynysyn qoldamady, dep habarlaidy "Ult aqparat" Azattyq agenttigine silteme jasap.
Deutsche Welle agenttiginiń habarlaýynsha, Resei usynysyn keńestiń turaqty múshesi Qytai jáne Qazaqstan men Boliviia ǵana qoldady. Tórt el qalys qalyp, jeti el qarsy daýys berdi.
Reseidiń BUU-daǵy elshisiniń orynbasary Dmitrii Polianskii Máskeý "Azov teńizindegi jaǵdai shielenisip, ýshyǵa bastaǵanyna bailanysty" Qaýipsizdik keńesiniń shuǵyl jiynyn ótkizýdi suraǵanyn aitty. Polianskiidiń sózinshe, qarashanyń 25-i kúni Kerch buǵazynda bolǵan janjalda Resei óz shekarasyn "qorǵap qalǵan". Resei elshisi Ýkraina "Azov teńizi áskeri aimaqqa ainalyp bara jatyr" degen máseleni "AQSh-tyń qoldaýymen shielenistirip otyrǵanyn" aitty. Ol sonymen qatar Resei ustaǵan kemelerdiń birinde "Ýkraina qaýipsizdik qyzmetiniń eki qyzmetkeri bolǵanyn" málimdedi.
Al Ýkraina Reseidiń BUU-da Kerch buǵazyndaǵy janjaldyń mánin burmalap otyr dep aiyptady. Ýkrainanyń BUU-daǵy ókili Vladimir Elchenko Resei ókiliniń málimdemesin "arsyz túrde faktini ádeii burmalap, barlyq jaýapkershilikti Ýkrainaǵa arta salý áreketi" dep atady. Elchenko ýkrain áskerileri Kerch buǵazynan kemelerin ótkizýge eki ret ruqsat suraǵanyn aitty.
Jiynda AQSh elshisi Nikki Heili AQSh, Niderland, Polsha jáne Shvetsiianyń atynan málimdeme jasap, Resei kótergen máselemen kelispeitinin aitty.
25 qarasha kúni tańerteń Kerch buǵazynda Resei áskerileri ýkrain kemelerin atqylap, ustap áketken. Birneshe áskeri jaralanǵan. Resei ýkrain kemelerin territoriiasyna "zańsyz kirdi" dep aiyptasa, Ýkraina kemelerdiń bul aýmaqtan ótetini "aldyn-ala eskertilgenin" aityp, Resei áreketin "bassyzdyq" dep ataǵan.
Ýkraina parlamenti janjalǵa bailanysty 28 qarashadan bastap eldiń birqatar aimaǵynda 30 kúnge áskeri jaǵdai jariialaýdy maquldady.
Batys elderiniń basshylary Reseidi aiyptap, ýkrainalyq teńizshiler men kemelerdi bosatýǵa shaqyrdy. Eýropa keńesiniń tóraǵasy Donald Týsk Reseidiń kúsh qoldanǵanyn aiyptap, Eýropa Odaǵynyń Ýkrainany qoldaitynyn málimdedi.
Qazaqstan BUU-da Ýkraina shyǵysyndaǵy reseishil separatister baqylaityn aimaqtarǵa jáne Resei anneksiialap alǵan Qyrym túbegindegi jaǵdaiǵa qatysty qararlarǵa qarsy daýys berip, Reseidi qoldap keledi.
Halyqaralyq uiymdar Qyrym anneksiiasyn zańsyz dep tanyp, Resei áreketin aiyptaidy. Batys elderi Reseige osyǵan bailanysty sanktsiia saldy. Resei túbekti jaýlap alǵanyn joqqa shyǵarady jáne "tarihi ádildik ornady" dep sanaidy.
