Petropavlda Abaidyń 175 jyldyǵyna orai biregei ádispen jasalǵan alyp panno paida boldy, dep habarlaidy "Ult aqparat".
Abaidyń alyp portreti Petropavldaǵy Abai kóshesi men Áýezov kósheleriniń qiylysynda, kópqabatty úidiń qabyrǵasynda paida boldy. Shamamen 150 sharshy metrdi alǵan bul panno keramikalyq mozaikadan qurastyrylǵan.
«Jumys qańtar aiynda bastaldy. Aldymen, jobasyn jasap, ony oblystyq ákimdikte bekittik. Qala ákimi Bolat Jumabekovtiń qoldaýymen sáýir aiynda iske kirisip kettik. Orasan jumys isteldi. Keramikalyq qysh taqtashalardyń árqaisysyna sýret salyp, ony óńdep, shatastyrmaý úshin nómirledik. Keramikalyq plitkanyń árqaisysyn 830 gradýs temperatýrada qyzdyrý kerek. Odan 10-15 gradýsqa asyryp jiberseń nemese jetkizbeseń – sapasy búlinedi. Kóp ýaqyt osy qysh taqtashalardy ázirleýge jumsaldy», - deidi jobanyń avtory, QR Sýretshiler odaǵynyń múshesi Bolat Áserbekov.
Qajetti material negizinen Almatyda ázirlendi.
«Bul jumysty qolǵa alǵanda táýekelge bel býdyq. Óitkeni buǵan deiin Qazaqstanda eshkim keramikalyq panno jasaǵan emes, sonyń ishinde adamnyń portretin. Jalpy, bul ádisti negizinen meshitterde qoldanady. Meniń jumystarymnyń biri – ol Petropavldaǵy 19-ynshy shaǵynaýdandaǵy meshittiń ishki bezendirilýi. Bul biregei jobada 4 adam jumys istedi. Olar almatylyq qurylysshylar, óz isiniń kásibi sheberleri. 20 jyl birge qoian-qoltyq eńbek etip kelemiz», - deidi sýretshi.
Bolat Áserbekov – Qazaqstanǵa tanymal sýretshilerdiń biri. Petropavldyń týmasy, qazir Almatyda turady. Negizgi mamandyǵy kórkem keramikamen bailanysty.
«Aisha bibi mazarynda, Qoja Ahmet Iasaýi mavzoleiinde, taǵy da basqa kóptegen tarihi eskertkishterde qysh taqtashalar qoldanylǵan. Olar áli kúnge deiin óńin bermei tur. Biz buǵan deiin mundai úlken kólemde qysh taqtashalarmen jumys istegen joqpyz. Birinshi jumysymyz, kóńilden shyqty. Tájiribe jinadyq», - deidi QR Sýretshiler odaǵynyń múshesi Bolat Aserbekov.
