Foto: Valerii Býgaev
Sot Kentaýdyń burynǵy ákimin para alǵany úshin kináli dep tanyp, 10 jylǵa bas bostandyǵynan aiyrdy, - dep habarlaidy Massaget.kz.
Almatynyń qylmystyq ister jónindegi mamandandyrylǵan aýdanaralyq sotynda Kentaýdyń eks-ákimi Dáýren Mahajanovqa qatysty úkim shyqty. Ol 366-baptyń 4-bóligi "Asa iri mólsherde para alý" boiynsha qylmys jasaǵany úshin kináli dep tanyldy.
"Sot Dáýren Sábituly Mahajanovty QR Qylmystyq kodeksiniń 366-baby 4-bóligi jáne 24-baptyń 7-bóligi ("Qylmysqa daiyndalý jáne qylmys jasaýǵa oqtalý") boiynsha qylmystyq quqyqbuzýshylyq jasaǵany úshin kináli dep tanýǵa úkim shyǵardy. Oǵan memlekettik qyzmette, sotta, Ulttyq bankte, vedomstvolarda, Qarjy naryǵy men qarjy uiymdaryn retteý jáne baqylaý organdarynda, memlekettik uiymda jáne kvazimemlekettik sektor sýbektilerinde qyzmet atqarýǵa ómir boiyna tyiym salý jáne on jyl merzimge bas bostandyǵynan aiyrý túrindegi jaza taǵaiyndalsyn. Jaza qylmystyq-atqarý júiesiniń barynsha qaýipsiz mekemelerinde óteledi. Merzim sot úkimi zańdy kúshine engen sátten bastap esepteledi. 2022 jylǵy 24 aqpannan bastap qamaýǵa alý merzimi jaza merzimine eseptelsin", - dedi Almaty qalasy qylmystyq ister jónindegi mamandandyrylǵan aýdanaralyq soty sýdiasy Mártpek Kákimjanov.
Bul is boiynsha basqa aiyptalýshylar - Lavrentii Bobryshev pen Baýyrjan Túmebaev 368-baptyń 1-bóligi "Paraqorlyqqa deldal bolý" boiynsha kináli dep tanyldy. Bobryshev 1 jylǵa bas bostandyǵynan aiyryldy. Ol jazasyn eń tómengi qaýipsizdik mekemesinde óteidi. Baýyrjan Túmebaev bir jyl alty aiǵa bas bostandyǵynan aiyryldy.
Sottalýshylardan protsessýaldyq shyǵyn retinde 171 000 teńge óndirildi. Sondai-aq, Mahajanovtan jábirlenýshilerge ótemaqy retinde 30 AEK (shamamen 91 myń teńge) kóleminde tólemaqy óndirildi. Bobryshev pen Túmebaevtyń árqaisynan 15 AEK (shamamen 45 000 teńge) kóleminde óndirildi.
Sot úkimine 15 kún ishinde shaǵym jasaýǵa bolatyny habarlandy.
