Kemerovoda "Zimniaia vishnia" saýda ortalyǵynda shyqqan órtten zardap shekken 32 jastaǵy Mihail Trýsov órt kezinde syrtynan jabyq turǵan kinozalda ne bolǵanyn aityp berdi.
Qazirgi ýaqytta ol Kemerovo oblystyq klinikalyq aýrýhanasynda jatyr. Tragediia bolǵan kúni er adam eki qyzymen kinoǵa mýltfilm kórýge barǵan. Áieli úide qalypty. Er adam aman qalǵanymen, eki qyzy órtten qaza boldy.
"Kórermender zalda otyrǵanda órt bastaldy. Ishinde 30-40 adam boldy", — dedi Mihail Ria Novosti aqparat agenttigine bergen suhbatynda.
Tútinniń iisin sezgen adamdar esikti ashpaq bolady. Biraq ol syrtynan jabyq turǵan. Órttiń shyqqanyn zaldyń ishindegi adamdarǵa eshkim habarlamapty.
"Zaldaǵy búkil adamdar kómek kútip otyrdy. 15 minýt kúttik. Sodan keiin ózimiz shyǵýymyz kerek dep sheshtik", — dep esine aldy sol kúngi tragediiany turǵyn.
Zaldaǵy adamdar qosalqy esiktiń aýzyndaǵy qulypty julyp alǵan. Biraq syrtta órt laýlap janyp, qara tútin jailaǵan eken. Mihail kómek shaqyrý úshin zaldan shyqqanymen, birden esinen tanyp qulaidy.
"Sol jerde esimnen tanyp jattym, qudaiǵa shúkir, meni bireýler taýyp aldy. Shamy janyp turǵan telefon meniń basyma qulap, meni kórip qalǵan siiaqty. Jedel járdem ishinde ólip ketemin dep oiladym. Tek aýrýhanada meniń ókpemdi tazalaǵannan keiin dem ala bastadym", — deidi Mihail.
Onyń topshylaýynsha, zaldan basqa eshkim shyǵa almady. Aýrýhananyń bas dárigeri Andrei Ivanov er adamnyń jaǵdaiy jaqsarǵanyn aitty. Sondai-aq oǵan psihologiialyq kómek kórsetilýde.
Barlyǵy Kemerovo aýrýhanasynda qazir 11 adam jatyr. Onyń ishinde tórtinshi qabattyń terezesinen sekirip ketken jasóspirim bar. Saýda ortalyǵyndaǵy órtten balanyń ata-anasy men qaryndasy qaza tapty.
