Kcell baspasóz qyzmetiniń basshysy Oljas Bibanov telefondardyń óshýi – 9 ai boiy abonentterge eskertilgen jaǵdai ekenin jetkizdi, dep habarlaidy QazAqparat.
«Túnde retteýshi IMEI-kod derekqorlarynda synaq jumystaryn júrgizdi. Burys tirkelgen nómirlerdiń barlyǵy osyndai qiyndyqqa dýshar bolyp otyr. Iaǵni JSN, telefon nómirine nemese IMEI-kody sáikes kelmeitin nómirler óshti. Bul negizinen jýyrda ǵana jańa SIM-kartalar salynǵan telefondarǵa qatysty», - dedi Oljas Bibanov QazAqparat tilshisine.
Ol nómirdi qaita tirkeý úshin uialy bailanys operatorlarynyń bólimshesine barýdyń qajeti joq ekenin aitady.
«JSN nómirińizdi 6006 nómirine SMS arqyly jiberýdiń ózi jetkilikti. Bul, árine, Kcell abonentterine qatysty», - dedi Oljas Bibanov.
Onyń aitýynsha, uialy telefon bailanysynyń joǵalýy máselesi birneshe saǵattyń ishinde retke keltiriledi.
Eske sala keteiik, 2019 jyldyń 1 qańtarynda Qazaqstanda abonenttik qurylǵylardy tirkeý protsesi aiaqtalǵan bolatyn. Bul mobildi telefondardyń urlanýyna, alaiaqtyqqa qarsy kúres maqsatynda istelip otyr.
