Tanymal ánshi Aigúl Imanbaeva ata-anasynan aiyrylý qorqynyshy týraly ashyq aityp, jan syryn aqtardy. Óner iesi ákesiniń qazasynan keiin anasyn joǵaltyp alýdan qatty qorqatynyn jetkizdi, dep habarlaidy ult.kz.
Ánshiniń sózinshe, ata-ananyń máńgi janymyzda júrmeitinin ol ákesi ómirden ótkende tereń túsingen. Sol ýaqytta Angliiada bilim alyp júrgen Aigúl elge oralǵan sátte anasyn qushaqtap, kóz jasyn tyia almaǵanyn eske aldy.
"Men ata-ananyń máńgi qasymda júrmeitinin ákem ómirden ótkende sezindim. Men sol kezde Angliiada oqyp júrmin. Úige kelgende anamdy bas salyp qushaqtap, jylaǵanym esimde. Táte, men seni joǵaltýǵa daiyn emespin. Ólimdi qabyldaý kerek ekenin bilemin. Biraq eshkim áke-sheshesin joǵaltýǵa daiyn emes. Anama: “Sen ketpeshi, júre turshy”, – dep jyladym", – dedi ánshi.
Aigúl Imanbaeva ákesimen 40 jyl boiy aralaspaǵanyn da jasyrmady. Araǵa uzaq jyldar salyp qaita qaýyshqanymen, kóp uzamai odan aiyrylý ánshige ońai soqpaǵan.
Óner iesi jaqyn adamynan aiyrylýdyń aýyr ekenin aityp, ásirese ananyń orny ár balanyń ómirinde bólek ekenin jetkizdi. Onyń sózinshe, adam qansha eseise de, ata-anasynyń janynda ózin bala sezinedi.
Ánshiniń júrekjardy áńgimesi áleýmettik jelide qyzý talqylandy. Jeli qoldanýshylary onyń sezimin túsinetinderin aityp, ózderiniń de analary men ómirden ótken jaqyndaryn eske alǵan. Keibir oqyrmandar óner iesiniń sózderin tyńdap otyryp, kózderine jas alǵandaryn jazǵan.
Aigúl Imanbaeva kim?
Aigúl Serikqulqyzy Imanbaeva – qazaqstandyq ánshi, aktrisa, telejúrgizýshi, Qazaqstannyń eńbek sińirgen qairatkeri. Ol 1977 jyly 15 naýryzda Jambyl oblysy Qordai aýdanyna qarasty Kenen aýylynda dúniege kelgen. Bala kezinen ónerge jaqyn bolyp, mýzyka mektebinde baian aspabyn meńgergen. 1994 jyly Temirbek Júrgenov atyndaǵy Qazaq ulttyq óner akademiiasyna túsip, 1998 jyly oqýyn aiaqtaǵan.
Eńbek jolyn Júsipbek Elebekov atyndaǵy estrada-tsirk kolledjinde oqytýshy bolyp bastaǵan. Keiin Ǵabit Músirepov atyndaǵy Qazaq memlekettik akademiialyq balalar men jasóspirimder teatrynda aktrisa retinde eńbek etti. 2001 jyly "Habar" arnasyndaǵy "Uiat bolmasyn" baǵdarlamasyna qatysyp, telejúrgizýshi retinde de tanyldy
Ánshilik jolynda "Tańǵy eles", "Aq gúlder", "Kúzben syrlasý" sekildi ánderdi oryndap, tyńdarman yqylasyna bólendi.
2004 jyly halyqaralyq "Aziia daýysy" baiqaýynyń «Qazaq ánderi» atalymynda bas júldeni jeńip aldy. 2006 jyly "Daryn" memlekettik jastar syilyǵynyń laýreaty atandy.
2011 jyly Almatyda "A.I" atty jeke teatryn ashty.
2015 jyly oǵan "Qazaqstannyń eńbek sińirgen qairatkeri" qurmetti ataǵy berildi.
Jeke ómirine kelsek, ánshiniń akter Sábit Ábdihalyqovpen burynǵy nekesinen Asyljan esimdi uly bar. 2024 jyly óner iesi qaita turmys qurǵanyn jariialady.
Búginde Aigúl Imanbaeva ánshilik pen akterlik ónerdi qatar alyp júrgen qazaq estradasynyń tanymal ókilderiniń biri.
