تانىمال ەنشٸ ايگٷل يمانباەۆا اتا-اناسىنان ايىرىلۋ قورقىنىشى تۋرالى اشىق ايتىپ, جان سىرىن اقتاردى. ٶنەر يەسٸ ەكەسٸنٸڭ قازاسىنان كەيٸن اناسىن جوعالتىپ الۋدان قاتتى قورقاتىنىن جەتكٸزدٸ, دەپ حابارلايدى ult.kz.
ەنشٸنٸڭ سٶزٸنشە, اتا-انانىڭ مەڭگٸ جانىمىزدا جٷرمەيتٸنٸن ول ەكەسٸ ٶمٸردەن ٶتكەندە تەرەڭ تٷسٸنگەن. سول ۋاقىتتا انگلييادا بٸلٸم الىپ جٷرگەن ايگٷل ەلگە ورالعان سەتتە اناسىن قۇشاقتاپ, كٶز جاسىن تىيا الماعانىن ەسكە الدى.
"مەن اتا-انانىڭ مەڭگٸ قاسىمدا جٷرمەيتٸنٸن ەكەم ٶمٸردەن ٶتكەندە سەزٸندٸم. مەن سول كەزدە انگلييادا وقىپ جٷرمٸن. ٷيگە كەلگەندە انامدى باس سالىپ قۇشاقتاپ, جىلاعانىم ەسٸمدە. تەتە, مەن سەنٸ جوعالتۋعا دايىن ەمەسپٸن. ٶلٸمدٸ قابىلداۋ كەرەك ەكەنٸن بٸلەمٸن. بٸراق ەشكٸم ەكە-شەشەسٸن جوعالتۋعا دايىن ەمەس. اناما: “سەن كەتپەشٸ, جٷرە تۇرشى”, – دەپ جىلادىم", – دەدٸ ەنشٸ.
ايگٷل يمانباەۆا ەكەسٸمەن 40 جىل بويى ارالاسپاعانىن دا جاسىرمادى. اراعا ۇزاق جىلدار سالىپ قايتا قاۋىشقانىمەن, كٶپ ۇزاماي ودان ايىرىلۋ ەنشٸگە وڭاي سوقپاعان.
ٶنەر يەسٸ جاقىن ادامىنان ايىرىلۋدىڭ اۋىر ەكەنٸن ايتىپ, ەسٸرەسە انانىڭ ورنى ەر بالانىڭ ٶمٸرٸندە بٶلەك ەكەنٸن جەتكٸزدٸ. ونىڭ سٶزٸنشە, ادام قانشا ەسەيسە دە, اتا-اناسىنىڭ جانىندا ٶزٸن بالا سەزٸنەدٸ.
ەنشٸنٸڭ جٷرەكجاردى ەڭگٸمەسٸ ەلەۋمەتتٸك جەلٸدە قىزۋ تالقىلاندى. جەلٸ قولدانۋشىلارى ونىڭ سەزٸمٸن تٷسٸنەتٸندەرٸن ايتىپ, ٶزدەرٸنٸڭ دە انالارى مەن ٶمٸردەن ٶتكەن جاقىندارىن ەسكە العان. كەيبٸر وقىرماندار ٶنەر يەسٸنٸڭ سٶزدەرٸن تىڭداپ وتىرىپ, كٶزدەرٸنە جاس العاندارىن جازعان.
ايگٷل يمانباەۆا كٸم?
ايگٷل سەرٸكقۇلقىزى يمانباەۆا – قازاقستاندىق ەنشٸ, اكتريسا, تەلەجٷرگٸزۋشٸ, قازاقستاننىڭ ەڭبەك سٸڭٸرگەن قايراتكەرٸ. ول 1977 جىلى 15 ناۋرىزدا جامبىل وبلىسى قورداي اۋدانىنا قاراستى كەنەن اۋىلىندا دٷنيەگە كەلگەن. بالا كەزٸنەن ٶنەرگە جاقىن بولىپ, مۋزىكا مەكتەبٸندە بايان اسپابىن مەڭگەرگەن. 1994 جىلى تەمٸربەك جٷرگەنوۆ اتىنداعى قازاق ۇلتتىق ٶنەر اكادەميياسىنا تٷسٸپ, 1998 جىلى وقۋىن اياقتاعان.
ەڭبەك جولىن جٷسٸپبەك ەلەبەكوۆ اتىنداعى ەسترادا-تسيرك كوللەدجٸندە وقىتۋشى بولىپ باستاعان. كەيٸن عابيت مٷسٸرەپوۆ اتىنداعى قازاق مەملەكەتتٸك اكادەمييالىق بالالار مەن جاسٶسپٸرٸمدەر تەاترىندا اكتريسا رەتٸندە ەڭبەك ەتتٸ. 2001 جىلى "حابار" ارناسىنداعى "ۇيات بولماسىن" باعدارلاماسىنا قاتىسىپ, تەلەجٷرگٸزۋشٸ رەتٸندە دە تانىلدى
ەنشٸلٸك جولىندا "تاڭعى ەلەس", "اق گٷلدەر", "كٷزبەن سىرلاسۋ" سەكٸلدٸ ەندەردٸ ورىنداپ, تىڭدارمان ىقىلاسىنا بٶلەندٸ.
2004 جىلى حالىقارالىق "ازييا داۋىسى" بايقاۋىنىڭ «قازاق ەندەرٸ» اتالىمىندا باس جٷلدەنٸ جەڭٸپ الدى. 2006 جىلى "دارىن" مەملەكەتتٸك جاستار سىيلىعىنىڭ لاۋرەاتى اتاندى.
2011 جىلى الماتىدا "ا.ي" اتتى جەكە تەاترىن اشتى.
2015 جىلى وعان "قازاقستاننىڭ ەڭبەك سٸڭٸرگەن قايراتكەرٸ" قۇرمەتتٸ اتاعى بەرٸلدٸ.
جەكە ٶمٸرٸنە كەلسەك, ەنشٸنٸڭ اكتەر سەبيت ەبدٸحالىقوۆپەن بۇرىنعى نەكەسٸنەن اسىلجان ەسٸمدٸ ۇلى بار. 2024 جىلى ٶنەر يەسٸ قايتا تۇرمىس قۇرعانىن جارييالادى.
بٷگٸندە ايگٷل يمانباەۆا ەنشٸلٸك پەن اكتەرلٸك ٶنەردٸ قاتار الىپ جٷرگەن قازاق ەستراداسىنىڭ تانىمال ٶكٸلدەرٸنٸڭ بٸرٸ.
