Túrkistan oblysy Qazyǵurt aýdanyna búgin jańa ákim taǵaiyndaldy. QR Prezidenti Ákimshiliginiń kelisimimen, Qazyǵurt aýdanynyń ákimi laýazymyna usynylǵan Arman Aidaruly Abdýllaevtyń kandidatýrasyn aýdandyq máslihat depýtattary biraýyzdan qoldaý bildirdi, dep habarlaid «Ult aqparat».
Jańa ákimdi aýdan aktivine Túrkistan oblysynyń ákimi Ómirzaq Shókeev tanystyryp, aldaǵy maqsat - mindetterin aiqyndap berdi. Aýdandaǵy halyqtyń áleýmettik-ekonomikalyq ál-aýqatyn kóterýdegi Elbasy N.Nazarbaev saiasatyn júzege asyryp, Memleket basshysy bekitken tapsyrmalardy sapaly oryndaýdy júktedi. Aimaq basshysy tórt jyldan asa ýaqyt Qazyǵurt aýdanyn basqaryp, óńir damýyna óz úlesin qosqan Tólegen Telǵaraevqa alǵys bildirip, aldaǵy qyzmetine sáttilik tiledi.
«Qazyǵurt aýdany ákiminiń aýysýy zań aiasynda, rotatsiia tártibimen júzege asyp otyr. Aýdan ákimine júkteler mindet kóp. Osy jaýapty qyzmetke tájiribesi mol, eńbekqor basshy keldi. Qazyǵurt - kúre jolda turǵan, shekaralas, strategiialyq mańyzy bar aýdan. Aýyl sharýashylyǵyn odan ári damytyp, kásipkerlikti órkendetýge kúsh salý kerek. Indýstrialdy aimaqqa investitsiia tartyp, infraqurylymdy odan ári damytyp, aýdan turǵyndaryn jumyspen qamtý mańyzdy. Eń bastysy, el birligin saqtap, eldiń ál-aýqatyn kóterýge aianbai jumys isteýińiz qajet. Al, ol úshin osyndaǵy el aǵalary, aqsaqaldar ákimge qoldaý kórsetip, yntymaqty joǵary orynǵa qoiǵany abzal», - dedi Ómirzaq Shókeev.
Óz kezeginde Arman Abdýllaev aimaq basshysyna senim bildirgeni úshin alǵysyn jetkizip, aldaǵy ýaqytta Qazyǵurt aýdanynyń damýy men órkendeýi jolynda bar kúsh-jigerin jumsaitynyna sendirdi.
Aita keteiik, Arman Aidaruly 1977 jyly Ońtústik Qazaqstan oblysy Qazyǵurt aýdany Jańabazar aýylynda týǵan. Bilimi joǵary, mamandyǵy - injener-ekonomist.
Memlekettik qyzmetti 2003 jyly Ońtústik Qazaqstan oblysynyń ekonomika departamentiniń jiyntyq taldaý bóliminiń bas mamany laýazymynda bastaǵan.
2007-2013 jyldary Ońtústik Qazaqstan oblysynyń kásipkerlik jáne ónerkásip departamentiniń kásipkerlik jáne innovatsiialyq qyzmet bóliminiń bastyǵy, Ońtústik Qazaqstan oblysynyń ekonomika jáne biýdjettik josparlaý basqarmasynyń biýdjettik saiasat jáne josparlaý bóliminiń bastyǵy, investitsiialyq saiasat bóliminiń bastyǵy, basqarma basshysynyń orynbasary laýazymdaryn atqarǵan.
2013 - 2018 jyldar aralyǵynda Ońtústik Qazaqstan oblysy Ekonomika jáne biýdjettik josparlaý basqarmasynyń basshysy, Ońtústik Qazaqstan oblysy Shardara aýdanynyń ákimi, oblys ákimi apparaty ekonomika jáne biýdjettik sala monitoringi bóliminiń basshysy, Túrkistan oblysy ákimi apparaty basshysynyń orynbasary – uiymdastyrý-inspektorlyq jumys jáne aýmaqtyq damý bóliminiń basshysy qyzmetterin atqardy.
2019 jyldan beri Túrkistan oblystyq strategiia jáne ekonomikalyq damý basqarmasynyń basshysy qyzmetin atqaryp keldi.
