«QazMunaiGaz» UK» AQ elimizdiń ońtústigindegi benzin jaǵdaiyna qatysty túsinik berdi, dep habarlaidy QazAqparat.

9 jeltoqsan kúni Shymkent qalasynyń jáne Túrkistan oblysynyń janar-jaǵar mai quiý beketterinde benzin tapshylyǵy týyndaǵany týraly habarlanǵan bolatyn.

Túrkistan oblysy ákiminiń orynbasary Rashid Aiýpov óńirdegi janarmai tapshylyǵy Pavlodar zaýytynyń ýaqytsha jóndeý jumystaryna toqtaýyna tikelei bailanysty ekenin jetkizdi. 

Al «QazMunaiGaz» kompaniiasy Qazaqstandaǵy 3 munai óńdeý zaýyty qazir jumys istep turǵanyn aitýda. 

««QazMunaiGaz» UK AQ qazirgi ýaqytta barlyq úsh qazaqstandyq munai óńdeý zaýyty qalypty jaǵdaida jumys istep turǵanyn málimdeidi.

Munai óńdeý jáne munai ónimderin shyǵarý QR Energetika ministrligi bekitken jospardan artyq oryndalýda. Shymkent munai óńdeý zaýyty táýligine shamamen 6 myń tonna benzin óndirip shyǵarady. Zaýyttan benzin munai berýshilerdiń ótinimderine sáikes ýaqtyly jiberilýde jáne táýligine 6 myńǵa jýyq tonnany quraidy. Bul kólemniń shamamen 2 myń tonnasy Túrkistan oblysyna jóneltiledi. 

Osylaisha, Shymkent óńdeý zaýyty tarapynan óńirde benzin tapshylyǵyn týdyratyndai esh negiz joq», - delingen kompaniia málimetinde. 

QMG dispetcherlik-saraptaý ortalyǵynyń derekterine sáikes osy jyldyń 10 jeltoqsanyndaǵy jaǵdai boiynsha Túrkistan oblysynyń munai bazalarynda AI-92 markaly benzinniń qory 15,4 myń tonnany quraidy. Bul oblystyń 12 kúndik suranysyna teń. 

«Budan bólek, resmi tulǵalardyń benzin tapshylyǵy Pavlodar munai-himiia zaýytyndaǵy jóndeýmen bailanysty týraly aqparat shyndyqqa janaspaidy. Sebebi PMHZ-da jóndeý jumystary osy jyldyń qazan aiynda aiaqtalǵan», - dep tolyqtyrdy «QazMunaiGaz» UK AQ-dan.