«QazMunaiGaz» ben AirAstana kompaniialaryn jekeshelendirýge qatysty sheshim biyl jazda qabyldanbaq. Bul týraly «Samuryq- Qazyna» ál-aýqat ulttyq qorynyń basqarma tóraǵasy Almasadam Sátqaliev málim etti, dep habarlaidy QazAqparat.
«Biyl 2 aqpanda Úkimet strategiialyq aktivter kapitalyndaǵy baqylaý úlesterin mindetti túrde saqtaý jónindegi talappen jekeshelendirýdiń jańartylǵan tizimin qalyptastyrý jónindegi negizgi ólshemderdi bekitti. Qazir biz Úkimetpen osy jańa kriteriiler negizinde jekeshelendirýdiń keshendi josparyna ózgerister engizýdi pysyqtap jatyrmyz. Atalǵan kriteriiler básekelestik ortada damý perspektivasy bar kompaniialardyń qyzmetine qatysty. Biz bul kompaniialardy satý, qaita qurý nemese taratý arqyly olardy básekelestik ortaǵa berýge daiynbyz», – dedi Almasadam Sátqaliev Ortalyq kommýnikatsiialar qyzmeti alańynda ótken baspasóz máslihatynda.
Qor basshysynyń aitýynsha, kompaniialardy IPO-ǵa shyǵarý ońai sharýa emes.
«Qubylmalylyq trendi búginde barlyq qarjy naryǵynda júrip jatyr. Osy oraida halyqaralyq investorlardyń bizdiń óńirge degen qyzyǵýshylyǵynyń belgili bir deńgeide tómendeýi baiqalady. Óz kezegimizde otandyq kompaniialardy kópshilik aldyna satýǵa shyǵarý úlken áleýetke ie dep sanaimyz. Bul oraida «QazMunaiGaz» jáne AirAstana kompaniialarynyń daiyndyq deńgeii óte joǵary. IPO-ǵa shyǵarýǵa qatysty sońǵy sheshim jazda qabyldanady», - deidi ol.
Sondai-aq, Almasadam Sátqaliev kompaniialardy jekeshelendirýde geosaiasi faktorlardyń da eskeriletinin aitty.
Eske sala ketsek, biyl qańtarda Úkimet basshysy Álihan Smaiylov «QazMunaiGaz», AirAstana men «QazaqGaz» IPO-ǵa shyǵarylatyny týraly habarlaǵan edi.
