Elimizdiń barlyq óńirin dizel otynymen úzdiksiz qamtamasyz etý máselesi boiynsha Premer-Ministrdiń birinshi orynbasary Roman Skliar bastaǵan Komissiia jumys istep jatyr. Ol arnaiy Úkimet basshysynyń tapsyrmasymen qurylǵan. Komissiia quramyna jaýapty memlekettik organdar men ulttyq kompaniialardyń ókilderi kirdi, dep habarlaidy primeminister.kz saity.
Komissiia el úshin mańyzdy janarmai jetispeýshiligine áser etken faktorlardy anyqtaǵan. Máselen, negizgi sebepterdiń biri otyn tutynýdyń aitarlyqtai ósýi bolyp otyr, birinshi kezekte sheteldik tranzittik kólik otyndy kóp tutynady. Ekinshi sebep – baǵanyń aitarlyqtai aiyrmashylyǵyna bailanysty Qazaqstannan kórshiles elderge dizel otynynyń jiberilýi.
Mysaly, Qazaqstanda dizeldiń bir litri – 230-260 teńge, al Ózbekstan, Qyrǵyzstan jáne Reseidegi janarmai beketterindegi baǵa 440 teńgege deiin jetedi.
Otandyq munai bazalary dizel otynyn bólshek saýda qunynan joǵary baǵamen satqan. Bul óńirlerde otyn satý kóleminiń qysqarýyna ákelgen, óitkeni ony satyp alý janarmai beketteri úshin tiimsiz boldy.
"Budan basqa «QazMunaiGaz», Petrosun kompaniialary, sondai-aq munai óńdeý zaýyttary tarapynan óndirý, marketing jáne logistikada júieli kemshilikter men olqylyqtar anyqtaldy.
Jaǵdaidy qalypqa keltirý jáne janar-jaǵarmai materialdarynyń ishki naryǵyn tolyq qamtamasyz etý úshin birqatar jedel jáne uzaq merzimdi sharalar qabyldandy:
- dizel otyny óndirisiniń kólemi biyl 5,2 mln tonnaǵa deiin ulǵaidy, bul 2021 jylǵa qaraǵanda 340 myń tonnaǵa joǵary;
- munai óńdeý zaýyttarynan dizel otynyn jóneltý kólemi ulǵaityldy;
- «Samuryq-Qazyna» qory jáne «QazMunaiGaz» UK AQ-men dizel otynynyń qosymsha kólemin jetkizý týraly kelisimge qol jetkizildi;
- Shymkent MÓZ-diń óndiristik qýatyn keńeitý josparlanǵan;
- 2023 jyldan bastap MÓZ jumysynyń jańa shemasyna kezeń-kezeńmen kóshý josparlanyp jatyr, onyń aiasynda munaidy zaýyttarǵa tikelei jer qoinaýyn paidalanýshylardyń ózi jetkizedi nemese munai MÓZ-di tikelei satyp alý jolymen jetkiziletin bolady.
Budan basqa Energetika ministrligi men janarmai beketteriniń iri jelilerinde koll-ortalyqtar ashyldy, onda qazaqstandyqtar baǵany negizsiz kóterý jáne janar-jaǵarmai materialdaryn satýdan bas tartý faktileri týraly habarlai alady" - delingen habarlamada.
Ýaqytynda tiisti sharalar qabyldamaǵany úshin «QazMunaiGaz» UK AQ basqarma tóraǵasy M. Myrzaǵaliev pen energetika vitse-ministri A. Maǵaýovqa qatań sógis jariialandy. Sonymen qatar tártiptik jazalaý sharalary qabyldanyp, Energetika ministrligi men QMG kompaniiasynyń birqatar jaýapty qyzmetkerimen eńbek qatynastary buzyldy.
Bul másele – Úkimettiń erekshe baqylaýynda, qyrkúiek aiynyń basynda jaǵdai turaqtalady dep kútilýde.
