"QazMunaiGaz" ulttyq kompaniiasy jumystan "5/50" boiynsha jumystan shyǵarylǵan jumysshylardyń úndeýine pikir bildirdi, - dep habarlaidy Tengrinews.kz tilshisi.
"2017 jyldyń sáýir aiynda "QazMunaiGaz" UK AQ Basqarmasy "Oil Services Company" JShS, "Oil Construction Company" JShS, "Oil Transport Korporeishen" JShS, "Munaitelekom" JShS jáne "Mańǵystaýenergomunai" JShS munai-servistik kásiporyndarynda "Taraptardyń kelisimi boiynsha qyzmetkerlermen eńbek shartyn merziminen buzý týraly erejeni" ("5/50" baǵdarlamasy) bekitti. Bul baǵdarlama aiasynda munai-servistik mekemelerdiń jumyskerlerine 5 jyldaǵy laýazymdyq eńbekaqysynyń 50 paiyz mólsherinde qomaqty ótemaqy tólei otyryp, taraptardyń kelisimi boiynsha eńbek shartyn buzý qarastyryldy", - delingen habarlamada.
Sondai-aq, kompaniia habarlamasynda ereje talaptaryn túsindirý maqsatynda jumys toptary qurylyp, eńbek ujymdarymen kóshpeli kezdesýler únemi ótkizilip turatyny aitylǵan.
"Jumyskerler "5/50" baǵdarlamasyna erikti túrde qatysqanyn atap ótken jón. Mysaly, Eńbek shartyn buzý týraly kelisimniń 1-tarmaǵynda "taraptar taraptardyń kelisimi boiynsha eńbek shartyn buzý týraly ekijaqty erikti kelisimge keldi" delingen. Sonymen qatar, usynystan bas tartqan jumyskerler osy ýaqytqa deiin QMG-nyń munai-servistik mekemelerinde jumysyn jalǵastyryp jatqandyǵy bunyń taǵy bir dáleli bolyp tabylady.
Kelisim talaptaryna sáikes jumyskerlerdi QMG-nyń munai-servistik kompaniialarynyń shtatyna qaita qabyldaý qarastyrylmady. Osylaisha, kompaniia 5 jyl ótkennen keiin jumystan shyqqan jumyskerlerdi qaita jumysqa qabyldaý týraly eshqandai mindetteme alǵan joq. Buǵan qaramastan, osy jyldyń 9 naýryzda burynǵy jumyskerlerdiń bir toby olarǵa 5 jylǵa tólengen aqsha qarajaty taýsyldy degendi alǵa tartyp, Mańǵystaý oblysynyń ákimdigine olardy QMG-nyń munai servistik mekemelerine qaita jumysqa alýdy talap etip keldi", - dep tolyqtyrdy kompaniia.
Jinalǵandarmen Mańǵystaý oblysynyń ákimi Nurlan Noǵaev jáne "QazMunaiGaz" UK AQ basqarma tóraǵasynyń orynbasary Qurmanǵazy Esqaziev kezdesken. Olar kezdesý qatysýshylaryna talaptarynyń zańsyz ekendigin túsindirip, máseleni sotqa júginý arqyly zań aiasynda sheshýge usynys bergen. "5/50" baǵdarlamasyna "Mańǵystaýmunaigaz" AQ munai-servistik mekemelerinen barlyǵy 3968 adam qatysty, olarǵa 43 milliard 881 million teńge jalpy somaǵa ótemaqy tólengen.
