Elordadaǵy «Qazmedia» ortalyǵynan órt shyqty, dep habarlaidy "Ult aqparat".
"Aldyn ala derekter boiynsha, kúnniń buzylýyna bailanysty qatty jel turyp, "Qazmedia" ǵimaratyna elektr qýatymen qamtamasyz etý júiesine sý tigen. Jaǵdaidyń mán-jaiy anyqtalyp jatyr, shatyr ishinara zaqymdanǵan bolýy múmkin. Depoda qosalqy stantsiianyń tutanýy saldarynan saǵat 20:15-te tele jáne radioarnalardyń efirleri toqtatyldy. Ǵimarattyń qulaqtandyrý júiesi qosylǵan jáne barlyq qyzmetkerdi evakýatsiialaý boiynsha sharalar qabyldandy. Tehnikalyq qyzmetter apat saldaryn joiý boiynsha jumystar júrgizip jatyr", - dep málimdedi "Qazmedia" ortalyǵynyń baspasóz qyzmeti.
Al, tótenshe jaǵdailar ministrliginiń málimetinshe, búgin saǵat 20:41-de Nur-Sultan qalasynyń TJD Órt sóndirý bólimsheleri «D.Qonaev kóshesi, 4» mekenjaiynda ornalasqan ǵimaratqa shuǵyl shaqyrtý boiynsha jetken.
«Órt sóndirýshiler kelgennen keiin parkingtegi transformatordyń janyp jatqany anyqtaldy. Adamdar qaýipsiz jerge shyqty. Qaza bolǵandar men zardap shekkender joq. Qazirgi ýaqytta oqiǵa ornynda Tótenshe jaǵdailar departamenti jeke quramynyń 13 mamany men 3 tehnikasy jumys isteýde», - dep atap ótedi ministrlikten.
Odan bólek, kún buzylýyna jáne órt saldarynan tehnikalyq aqaýlarǵa bailanysty "Habar 24" telearnasy habar taratýdy ýaqytsha toqtaǵanyn habarlady.
Aita keteiik, Qazmedia ortalyǵy ǵimaratynda "Habar", Qazaqstan, "Eýraziia Birinshi arnasy" jáne taǵy basqa respýblikalyq memlekettik arnalardyń keńsesi ornalasqan.
